Enwer Yılmaz
Parlameneterê DEM Partî Sirri Sureyya Onder roja yewşeme dinyaya xo bedilnabi.
Tirmê ey vizêr Îstanbul de amebi definkerdiş û hezaran kesî beşdarê merasîmê cenazeyê ey bibî.
Semedê ey xeylê bajaranê Kurdan de ewro tazîyeyî ameyî ronîyayîş.
Ewro Amed de seyan kesî şîyê zîyaretê tazîya ke bînaya Rêxistina DEM Partî ya Amedî de ameya ronayîş.
Endamê Platforma Ked û Demokrasîya Amedî, parlamenterê verên, Dayîkê Aştîye û Temsîlkarê rêxistinanê komelê sivîlî yê demokratîkan şîyê zîyaretê tazîya.
Hemşaredarê Bajarê Girdî yê Amedî Dogan Hatun uca de qisey kerd û va: "Wa dayîkê ma xo bêhêvî nêkerê. Bi hezaran embazê ma seba aştîye merdê. Na, ala ya. Înan na ala heta roja ma arde û no bar nika zî milê ma ser o yo. Ma nêverdenê ke a ale bikew erd. Alaya ke Sirri ardbî ma do berz bikerê û aver berê. Ma do barê ey zî bigîrê milê xo ser, hîna zaf bixebitîyê û aştîya mîyanê şaran bîyarê meydan."
Hemşaredara Bajarê Girdî ya Amedî Serra Bucake zî nê çîyî vatî: "Sey heme vîndîbîyayîşan, no vîndîbîyayîş zî ma rê vîndîbîyayîşêko bêwext bi. Coka zerrîya ma pêro veşena. Sirri Sureyya Onderî hem şarê Kurdî rê hem şarê Tirkîya rê hem zî komeleyan rê ke seba demokrasî û heqê merdiman têkoşîn kenê, erjê zaf girdî verday. Heta ke aştî bêra erdê ma ser na têkoşîn dewam biko. Vîrardişê ey do rayîrê ma roşnî bikero."