ZAZAKÎ NEWS - Avukato Kurd Rezan Epozdemîr, bi sûcdarîya "mîyancîtîya ruşwetî" tewqîf bi. Epozdemîr, çarçewaya di tehqîqatanê cîyayan ê Serdozgerîya Komare ya Îstanbulî de amebi tepiştiş.
Çar rojî verî, derheqê Epozdemîrî de bi sûcdarîyanê "ruşwet", "hetkarîya rêxistina terorî ya FETOyî" û "sîxurîya sîyasî û leşkerî" di tehqîqatê cîyayî amebî akerdiş.
Dozgerîye waşt ke Epozdemîr bi sûcdarîyanê "mîyancîtîya ruşwetî" û "girewtişê ruşwetî" bêro tewqîfkerdiş.
Dadgeha nobedare qerar da ke Epozdemîr sucê "mîyancîtîya ruşwetî" ra bêro tewqîfkerdiş.
Çi bîbi?
Yew tehqîqatî de, yew şahido bi nameyê A.D. îdîa kerdbi ke Epozdemîrî 3 rey ruşwet girewto.
Goreyê îdîaya şahidî, yew hediseyê serra 2021î de, Epozdemîr û yew keso bi nameyê C.Ç. seba veradayîşê yew kesî, 150 hezar dolar ruşwet girewto. Amebi îdîakerdiş ke 75 hezar dolar verê veradayîşî û 75 hezar dolar zî dima ke veradayîş bi, ameyo dayîş.
Şahidî îdîa kerdbi ke C.Ç.yî 7ê Temmuza 2021î de, 75 hezar dolarê nê pereyî bi destê xo berdo, dayo Epozdemîrî. Ame parekerdiş ke qeydê "WhatsAppî" zî na îdîaye tesdîq kenê.
Rezan Epozdemîr lajê serekê verên yê HAK-PARî Latîf Epozdemîrî yo.
