ZAZAKÎ NEWS - Avûkatê Selahattîn Demîrtaşî Mahsûnî Karamanî va ke, 8ê Teşrîna Verêna 2025 roja muhîm a û eke Tirkîya vera qeraro peyên yê Mehkemeya Heqanê Merdiman a Ewropa (MHME) nêvejîyoo, Demîrtaş eşkeno bêro veradayîş.
"Nimûneyê MHPyî manîdar o"
Mahsûnî Karamanî da zanayîş ke wextê îtîrazê hukmatî yê vera qerarê binpaykerdişî yê MHMEyî ya 8ê Temmuze, 8ê Teşrîna Verêne ya 2025 de qedîyeno û vat:
"Senî ke MHPyî seba dosyaya Kobanê îstînafî rê muracat nêkerd, beno o ke hukmat zî vera qerarê MHMEyî îtîraz nêkero."
Karamanî eşkerayîya xo de wina vat:
"MHMEyî heta nika derheqê cenabê Demîrtaşo ke 4ê Teşrîna Peyêne ya 2016î ra nata hepisxane de yo, 3 reyî qerarê binpaykerdişî da û waşt ke bêro veradayîş, la nê qerarî nêameyî caardiş.
Karamanî ard vîrî ke Mehkemeya Cezaya Girane ya 22ine ya Anqara muracatê înan yê seba veradayîşî yê ke badê qerarê peyênî kerdbî, red kerdbi û sey bahane vatbi ke qerarê MHMEyî "hîna qetî nîya" û "Demîrtaş êdî seba gumanê sûcî ney, seba mehkûmîyetî hepisxane de yo."
Vengdayîş Seba Pêvajoyê Çareserîye
Mahsûnî Karamanî peynîya eşkerayîya xo de veng da û va, ganî Mehkemeya Îstînafî dosya kontrol biko û sey yew lazımitîya huqûqî Demîrtaş û embazanê ey verado.
Karamanî va, seba ke "prosesê çareserîye" yo ke nika dewam keno bawerî bido, veradayîşê mehkûmanê Dewayê Kobanê lazim o û heta mecburî yo.
