Bajaranê Sêwas û Mûşî de semedê vewra zêde û pûkî ra rayîrê 60 dewan ameyî qefilnayîş. Ame eşkerakerdiş ke ekîbê eleqedarî seba akerdişê rayîran dest bi xebate kerdo.
Sêwas de rayîrê 46 dewan ameyî girewtiş
Goreyê eşkerayîya Îdareyê Xusûsî yê Wîlayetî yê Sêwasî, ewro herême de vewra zêde varaya û semedê ney ra rayîrê 46 dewan ameyî girewtiş.
Eşkerayîye de ame îfadekerdiş ke seba akerdişê rayîranê girewteyan ekîbî ameyê şawitene û seba nexweşan û cinîyanê diganan hetkarîye yena dayîş.
Sazîya Meteorolojî ya Tirkîya zî da zanayîş ke texmîn beno ke serd do dewam biko.
Mûş de rayîrê 14 dewan ameyî girewtiş
Mûş de zî semedê hewayê xirabî ra rayîrê 14 dewan ameyî girewtiş. Cayanê berzan ê bajarî de, vewra ke şewe varabî bî sebebê astengîyan.
Sekreterê Pêroyî yê Îdareyê Xusûsî yê Wîlayetî Şeyhmus Yenturî eşkera kerd ke pêro şewe vewre varaya û wina va:
"Ekîbê ma rayîran ser o xebitîyenê. Seba ke şar tengîye meanco, ma do wextêko kilm de rayîran akerê."