ZAZAKÎ NEWS - Televîzyonê dewlete yê Sûriye Îxbarîye (Al-Ikhbariya) tarîxê xo de reya verêne bi ziwanê Kurdkî weşan kerd.
Pêşkêşkara kanala Îxbarîye, xebera pêvînayîşê heyetê) Encûmenê Niştimanî yê Kurdê Sûriye (ENKS) û Serekkomarê demkî yê Sûriye Ehmed Şerî, ya ke Qesra Şarî ya Şamî de bîye, bi Kurdkî pêşkêş kerde.
Endamê Rayberdoxîya ENKSyî Nîmet Dawûdî derheqê pêvînayîşê bi Ehmed Şerî de ercînayîşî kerdî. Dawûdî dîyar kerd ke pêvînayîş pozîtîf (erênî) vîyarto û kêfweşîya xo ya seba weşana Kurdkî ya televîzyonê fermî yê Sûriye ard ziwan.
"Ewro seba Sûriye û şarê Kurdî rojêka tarîxî ya"
Nîmet Dawûdî serê pêvînayîşî wina va:
"Ewro seba Sûriye û şarê Kurdî rojêka tarîxî ya. Ma sey Kurdan xo sey parçeyêkê Sûriye û dergîya tarîxî de zî sey şirîkê aye vînenê. Ma do ameyox de zî şirîkatîya xo bidomnê."
Dawûdî her wina va: "Estbîyayîşê ma yê Şam de û pêvînayîşê ma yê bi hukmatî reyde, wezîfeyê ma yê niştimanî yo."
Pêkerdişo ke Kurdan şinasneno
Biryarnameya ke Serekê Demkî Ehmed Şerî îmze kerdbî de ameybî vatene ke, "Welatîyê Kurdî yê Sûriye sey parçeyêko bingeyên û resen ê şarê Sûriye yenê qebulkerdene."
Biryarname de ame eşkerakerdene ke do heqê hemwelatîbûnî bidîyo ê Kurdanê ke Wîlayetê Heseke de bênasname ameyê verdayene. Her wina warê perwerde û kulturî de zî seba Kurdan xeylêk heqî ameybî naskerdene.
