Federasyonê Komelanê Cinîyan ê Tirkîya (TKDF), raporê xo yê aşma Teşrîna Verêna 2025î weşana.
Goreyê raporî, aşma Teşrîna Verêne de 27 cinîyî ameyî kiştene. Mergê 5 cinîyan zî sey bişik ame qeydkerdene. Bi no hawa, 10 aşmanê verênan ê serra 2025î de hûmara cinîyanê ke ameyî kiştene, resa 317.
Ame qeydkerdene ke zafanê cinîyanê kişteyan, hetê "camêrdanê tewr nêzdîyan ê xo" ra û "keyeyanê xo de" ameyî qetilkerdene.
Daneyê ke rapor de ca girewtî wina yê:
“Goreyê rewşa înan a medenîye, tesbît bi ke cinîyanê kişteyan ra 12 hebî zewijîyaye, 6 hebî bêzewac û 6 hebî zî cîyabîyaye bîyê.
Goreyê mabênê emrî, tewr cîwana ke ameye qetilkerdene 17 serre, tewr pîle zî 69 serre bîye. Cinîyê ke mabênê 36-50 serran de yê, bi oranê %48î rêza verêne de yê.”
