ZAZAKÎ NEWS- Amed de ewro çalakîyêka muhîme ya bi nameyê “Cinîyî Aştîye Qisey Kenê” virazîya. Vervatoxa Partîya DEMî Ayşegule Dogane program de qiseykerdişêk kerd û va ke dej û derdê en pîlî cinî antî.
Çalakîye, bi hemkarîya Odeya Tîcaret û Senayî ya Amedî (DTSO), Komela Cinîyanê Karsazan a Rojhelat û Başûrê Rojhelatî (DOGÜNKAD), Heyeta Cinîyanê Teşebuskaran a Amedî ya Yewîya Ode û Borsayan a Tirkîya (TOBB) û Enstîtuyê Averşîyayîşê Demokratîkî (DPI) ame organîzekerdiş.
Partîya DEMî Ayşegule Dogane va:
"Ma sey cinîyanê nê erdan; bi Tirk, Kurd, Ermenî, Êzîdî, Suryanî û Keldanî pîya ma eşkenê pawitêşê tecrubeyan û kombîyayîşanê xo, na aştîye bîyarê ca. Eke ma cinîyî bi awayêko xurt mucadele bikerê, seba aştîye xo organîze bikerê û kîşta yewbînan de bivine, o çax ma eşkenê serbikewê.”
"Aştîya ke cinî tede nêasena dayîmkî nîya"
Hemsereka Şaredarîya Pîle ya Amedî Ayşe Serra Bucak Kuçuk zî qisey kerd. Bucake îfade kerd ke prosesê aştîye de eke cayêk de cinî nêasa û vengê cinîye mehesîyo, a çareserîye tu rey (qet) nêbena çareserîyêka dayîmkî.
Endama Meclîsê Partîye ya CHPyî Emîney Uçak Erdogane zî îzah kerd ke ê sey cinîyan tim seba “aştîye” xebitîyenê. Erdogane seba "prosesê aştîye" va: “Ez fikirîyena ke no prosesêko zaf muhîm o. Ganî Tirkîya rew ra biamêne na merhele. Seba paştîdayîşê nê prosesî, keda partîyan û yê komîsyonî ma zaf keyfewş ê.”
Program de Sereka DOGÜNKADî Ozleme Kulahçi Tanamane û Endama Heyetê Rayberdişî ya DTSOyî Seda Berekatoğluye zî qiseykerdiş kerdî.