Badê hişyarîyanê Mudirtîya Meteorolojî ya Herême, vewra ke Amed de pawîyayêne saetanê şewdirî de dest pêkerde. Merkezê bajarî û qezayan de vewre tesîrê xo zêde kerd û demêko kilm de cade û kuçeyî bi rengê sipî xemilnay.
Heyat vindert
Vewra girane reyde komresîya bajarî de kêmanîyî ameyî meydan. Xeylê nuqtayan de rayîrî qefilîyay, şoforê wesayîtanê xusûsîyan rayîr de mahsur mendî. Rayîrê Amed-Riha ke seba bajarî nuqtayêko muhîm o de trafîk xetimîya. Semedê rêzê wesayîtan ê ke resayê kîlometreyan, wendekarî mektebî ra, xebatkarî zî mesayîya xo rê erey mendî.
Semedê vewre tayê nêweşxaneyan de emelîyatî ameyî taloqkerdiş. Heto bîn ra ame musayîş ke cayanê ke binê kontrolê Mudirtîya Rayîranê Bejayî yê de ekîbî kêmî mendê. Şoforan, vera ekîban razînêbîyayîşê xo nişan da. Probleme trafîkî kûçeyanê Amedî de zî ame dîyayîş.
Semedê vewra zêde beyntarê Amedî û qezayanê Pasûr (Kulp), Farqîn, Licê, Pîran (Dicle), Hêni, Hezro û Gêlî (Eğil) de seferî betal bîyî. Wesayîtê ke lastîkê zimistanî nêxebitnêne rayîr de mendî, hemwelatîyan pawit ke ekîbî mudaxeleyê rayîran bikerê.
Mektebî bîyî tatîl
Semedê dewamkerdişê varayîşê vewre, Walîtîya Amedî eşkera kerd ke merkez û tayê qezayan de mektebî ameyê tatîlkerdene.