ZAZAKÎ NEWS - Şaxê Eğitim Senî yê Amedî, MED-DER û xeylê temsîlkarê sazîyanê sîvîlan û partîyan wesîleyê roja destpêkê demê perwerdeyî de Amed de verê Mudirîya Perwerdeyî ya Mîlî de beyanatêk da çapemenî.
Beyanatê Komela Cigêrayîşê Ziwan û Kulturê Mezopotamya (MED-DER) û Eğitim Senî cêr de yo
RAYA PÊROYÎ RÊ
Senî ke seba heme şaran perwerdeyo bi ziwanê maye heqêko xozayî yê neteweyî yo, seba şarê Kurdî zî no heq heqêko xozayî yê neteweyî yo û estbîyayîşê şarê Kurdî reyde têkildar o. Coka ra vergirewtişê nê heqî rasterast nêşinasnayîşê nasnameyê kurdan o. No proseso muhîm de zî ma vînenê ke vergirewtişo tewr pîl o ke verê aştîye de yo nêşinasnayîşê ziwanê may o, qebilnêkerdişê nasnameyê kurdan o. Ma no hîşmendî roniştişê komîsyonî de vengbirnayîşê dayikanê aştîye de zî dî. Eke no zîhnîyet nêşiko esasê seypêyî û edaletî de waye û biratî nêyena pironayîş; ma nêeşkenê qala aştiyeka menda bikê. Seba aştîye ganî verê hemîn ziwanê şarê Kurdî qanûnan de bêro şinasnayîş, verê perwerdeyê ziwanê maye abo.
Perwerdeyê bi ziwanê maye heqê ma yo!
8ê Êlule de heme cayanê Tirkîya û Kurdistanî de wendegehan de serdemê perwerdeyî yo newe dest pê keno. Seba Kurdan û şaranê bînan no perwerde nîyo, demê helênayîşî, demê kîştişê kulturî û çinîkerdişî yo. Ma nêwazenê êdî wendegehan de nasnameyê xo vîndî bikê. Ma perwerdeyê bi ziwanê xo wazenê. Lazim o ke heme vergirewtişê ke verê Kurdkî de yê wedarîyê û statuyê Kurdkî bêro qebilkerdiş. Rayêka bîne çinî ya.
Ganî sermîyanê dewlete samîmî bê û game bierzê!
Nûman Kûrtûlmûş qiseykerdişê xo de vatbi “çi waştiş nêameyo seba perwerdeyê bi ziwanê maye”. No raşt nîyo! No çend serrî yo ke ma vanê ma perwerdeyê bi ziwanê maye wazenê. Nêbeno ke qedexekerdiş û asîmîlasyonê se serran ewro ra pey heman hawa dewam biko. Seba aştîye, verê heme çîyî lazim o ke heq û huqûqê şarê Kurdî bêrê şinasnayîş. Perwerdeyo bi ziwanê maye heqêko tewr bingeyîn yê merdiman o, coka ra êdî bê munaqaşe û apeyvistişî lazim o ke no heq bêro bicaardiş.
Perwerdeyo bi Kurdkî ameyoxê gedeyanê ma yo! Ma nasnamekîştîşî red kenê!
Perwerdeyo bi ziwanê maye tena seba ewroyî nê, esasê xo de seba meştê ma yo. Ma anê vîrê herkesî: nêşinasnayîşê statuyê Kurdkî û vergirewtişê perwerdeyê bi Kurdkî verê aştîyêka menda û domdare gêno. Ma reyna vanê ke senî beno wa bibo ma sîyasetê asîmîlasyonîst û helênayîşî qebûl nêkenê û de’waya heqanê xo yê kolektîf yê nasnameyî kenê. Heya ke no bi ca nêyero ma fek bi têkoşînê ziwan û nasnameyî vera nêdanê.
Sey qala peyene, ma veng bi heme partî, sazî û dezgeyanê kurdan û şarê xo danê: Bêrê ma têkoşînê ziwanê kurdkî hîna berz bikê. Verba heme tewir polîtîkayanê asîmîlasyonîstan keyeyanê xo bikê wendegehê kurdkî û waştişê perwerdeyê bi kurdkî û şinasnayîşê statuyê kurdkî bi vengeko berz bîyarê ziwan.
Perwerdeyo bi kurdkî heqê ma yo, meseleya munaqaşeyî nîya!
Ma perwerdeyê bi ziwanê maye wazenê!
Qedexekerdişê perwerdeyê bi kurdkî vergirewtişê aştî yo!
ŞAXÊ EGITIM SENÎ YÊ AMEDİ / MED DER
