Îshaq Tepe, yo ke hem sîyaset û kulturê Kurdkî de nameyêko şinasîyaye bi hem zî 32 serrî yo ke seba lajê xo yo ke amebî qetilkerdiş edalet geyrayêne, merd.
Tepe, serra 1941î de dewa Meydan a Modkanî ya Bedlîsî de amebi dinya. Ey, hem sîyasetê Kurdkî de hem zî mucadeleyê kulturî yê Kurdan de sey yew nameyo şinasîyaye ca girewt. Ey, serranê 1960î ra nata bi hawayêko aktîf sîyaset de ca girewt.
Tepeyo ke serra 1984an de sey endamê Meclîsê Şaredarîya Bedlîsî ame weçînayîş, bi serran hetkarîya serekê şaredarîye kerde. Serra 1992yan de bi Serekê Teşkîlatê DEPyî yê Bedlîsî. Dima ke DEP ame padayîş, HADEP de sey Mesuldarê Pêroyî yê Darayî wezîfe girewt û kar û barê darayî-îdarî yê partîye rayra berd.
32 serrî bîyî ke lajê xo cî geyrayêne
Serra 1993yan de Bedlîs de keso ke ame remnayîş û qetilkerdiş lajê ey Ferhat Tepe bi. A roje ra nata 32 serrî bîyî ke edalet geyrayêne. Keyeyî dewaya Ferhat Tepeyî berde heta Mehkemeya Heqanê Merdiman a Ewropa (MHME) û Tirkîya da mehkûmkerdiş. Bi nê hawayî, meseleya "cînayetanê faîlmeçhûlan" ard rojdemê mîyanneteweyî.
Sîyasetî ra heta xebatanê kulturî
Îshaq Tepe, serra 2003yan de sîyasetê aktîfî ra xo ant û dima ra rîyê xo çarna fealîyetanê komelê sîvîlî û kulturî ser. Serra 2011an de sey endamê heyetê ronayoxî û mesuldarê îdareyî yê Weqfa Beşîkçî de wezîfe girewt.
Nuştox û kedkarê kulturî
Tepeyî, seba pawitişê ziwan û kulturê Kurdkî zî xebatê muhîmî kerdî.
