Merkezê Kulturî û Kongre yê Çand Amedî, badê prosesê qeyûmî newe ra bî merkezê çalakîyanê kultur-hunerî û cayê têhetameyîşê hunerhesan. Cayo ke sînema ra heta şanoyî, muzîkî ra heta folklorî her aşme hezaran kesan rê beranê xo akeno, bi Festîwalê Fîlman ê Amedî yo 3. yo Mîyannetewî no têhetameyîş resna zîrweyê xo.
Bîngeyê merkezî serra 2016î de hetê Şaredarîya Amedî ya Şaristanê Girdî ra ame ronayene. La hema akerdişê fermî nêbîybî ke bi qeyûman çalakîyê kultur-hunerî ameyî vindertene. Şanogerî karî ra ameyî vetene, xebatê Konservatuwara Şaristanî ya Aram Tigranî ameyî vindertene. Reyna zî hunermendan berhemardişê xo ra fek nêverda.
Badê bi weçînîyayîşî qezencbîyayîşê şaredarîyan, şarê şaristanî, hunermendî û hunerhesî resayî hesreta xo. Ewro Çand Amed, her aşme bi hezaran kesan hunerî reyde ano têhet.
'Ma enerjî û beşdarîyêka zaf başe dîye'
Rêjîsor Veysî Altayî, bal ante muhîmîya badê 8 serran newerakerdişê festîwalî ser o û va: "Ma enerjî û beşdarîyêka zaf başe dîye. Salonêka sînemayî derûdormeyê ma çin bî. Şaredarîya Şaristanê Girdî seba naye gamêka muhîme eşte. La bi prosesê qeyûmî her çîyo ke ma xeyalê ci kerdêne ame taloqkerdene."
Şanoger Erdal Cevîzî zî ard vîrardene ke bi tayînkerdişê qeyûman çalakîyê kultur-hunerî ameyî vindertene û va: "Biryayîşê na lezîye û hêvîye amanc bîye. La şanogerî û muzîkkaran newe ra cayê xo viraştî, xebatanê şanoyî û muzîkî, festîvalî her çiqas zehmetî bibê zî dewam kerd."
Senarîst-rêjîsor Huseyîn Kuzuyî zî îfade kerd ke prosesê qeyûmî de enerjîyê Amedî şî merkezanê bînan û ewro no enerjî newe ra agêrena şaristanî. Kuzuyî va: "Mîyannetewîbîyayîş muhîm o la pawitişê orîjînalîye zî lazim o. Seba ke Amed eşkeno dinya reyde girêyê qewetinî rono, lazim o ke festîvalî newe ra bêrê modelkerdene."
