ZAZAKÎ NEWS - Fotografê ke Çewlîg ra ameyî parekerdiş, lêşinîya mintiqaya pîknîkî û rîskê adirî anê verê çiman. Kesê ke şinê mîyanê daristanê Çewlîgî uca de bîrayan şimenê û şuşeyanê bîrayan erzenî nata weta. Kesê ke xozaya Çewlîgî pawenî zî mecbur manenî ke ê şuşeyan arê bidî.
Aktîvîstê xoza Cahît Yıldırım, o ke herêma Çamlikî ya Yenîmahalleyî de embazanê xo dir xebata pakkerdişî kerda, semey nê halî hêrsê xo nîşan da û va, tayî yenî tîya de wenî-şimenî la çopanê xo erzenî nata-weta.
Cahît Yıldırımî va: "Badê cû vanî 'Adirê daristanî çira vejîyeno?'. Ewro ma bi çend embazanê xo amey mintiqaya Çamlikî. Ma dî ke tîya bîyo pirr çop, ma dest kerd ci ke pak bikî. Ma verê çimanê înan de çopê înan arê da"
Aktîvîstî îfade kerd ke, şar semedê temaşekerdişê manzaraya Çewlîgî yeno verê Sahaya Çamlikî ya Yenîmahalleyî, va: "Milet, semedo ke manzara bivîno yeno tîya. La tîya bîyo pirr şûşeyê bîra û alkol."