ZAZAKÎ NEWS - Ciwanê ke hesabê Instagramî "Dersimgram" ser o ameyî pêser, pereyê ke bi hetkarî amê pêser, 2 hezar kesan rê aşure viraşt û welatîyan rê vila kerd.
Hesabê Dersimgramî, ke 150 hezar teqîpkerdoxê ey esto û tarîx, kultur, bawerî û xozaya Dêrsimî ser o parekerdişan keno, bi wesîleya aşma Muharremî ya ke seba Elewîyan bimbarek a, kampanyayêka hetkarîye da destpêkerdene. Bi pereyê ke ame arêdayîş, 2 hezar kesan rê "Aşureyê Yewîye" ame viraştiş.
Parka Seyîd Rizayî de, verê vilakerdişê aşureyî, Dedeyê Ocağê Qureyşan Kadîr Bulutî gulbang wend.
Dima ke duayî ameyî wendiş, loqmeyî ameyî parekerdiş û ey ra dima, welatîyan rê aşure ame vilakerdiş.
Rayberanê hesabê Dersimgramî îfade kerd ke ê do seba peynîardişê hedîseyanê şîdetî yê ke wextanê peyênan de mabênê ciwanan de zêdîyayê û seba xurtkerdişê yewîya cimatî çalakîyanê xo bidomnê.
Dedeyê Ocağê Qureyşan Kadîr Bulutî va, "Ewro rojeyê Muharremî qedîya, kamî roje girewo wa qebul bo, kamî aşure viraşto wa qebul bo. Ma sey rîpelê Dersimgramî, bi ciwanan reyde ameyî pêser û seba aşma Muharremî ma aşure viraşt û vila kerd."
Welatîyanê ke tewrê çalakîye bîyê, keyfweşîya xo arde ziwan û sipasîya kesanê ke na çalakîye organîze kerda, kerde.
