Şubeyê Eğitim Senî yê Erxenî, bi şîarê "Hîkayeyêka her kesî esta", bi Tirkî, Kurmancî û Kirmanckî (Zazakî) musebaqaya hîkayeyan virazeno û muracatî heta 20ê Nîsana 2026î dewam kenê.
Şubeyê Eğitim Senî yê Erxenî yê Şaxa Amedî ya 3 No'yî, Musebaqaya Hîkayeyan a Narîn Guran a Dîyîne organîze keno. Musebaqaya, bi şîarê "Hîkayeyêka her kesî esta" û bi amacê zêdekerdişê hewesê wendiş û nuştişî mîyanê şarî de yena viraştene.
Şertê beşdarîye:
Ziwanê Musebaqa Tirkî, Kurmancî û Kirmanckî (Zazakî) yo. Babeta hîkayeyan serbest a, la ganî hîkayeyî hetê şuxulnayîşê ziwanî, hunerê edebî û ercê merdimîye ra aver bê. Hîkayeyî ganî bi hawayêko zelal bêrê nuştene û formatê înan Word bo. Hîkayeyê ke verê cû cayêk de nêameyê çapkerdene, eşkenê beşdar bibê.
Beşdarî, ganî eseranê xo heta tarîxê 20.04.2026 biresnê destê komîteya ercîyayîşî. Her kes eşkeno bi yew eserî beşdar bibo û esero ke şawîyeno ganî tewr tay 4 û tewr zêde 15 rîpelan ra bêro pê.
NOT: Hîkayeyê ke bi hişê sunî (yapay zeka) ameyê nuştene do qebul nêbê.
Heyetê weçînayîşî:
Heyetê weçînayîşî de nameyê namdarî yê sey Metin Aktaş, Murat Ozyaşar, Kerem Bakici (Tirkî); Mehmet Şîrîn Bulga, Azad Zal, Elîf Gemîcîoglu Yaviç (Kurmancî); Denîz Gündüz, Bedrîye Topaç û Omer Barasi (Zazakî) ca gênê.
Xelatî:
Xelatî seba her kategorî cîya-cîya do bêrê dayene:
Yewine rê: 7500 TL
Dîyîne rê: 5000 TL
Hîrêyîne rê: 2500 TL
Netîceyê Musebaqa do roca 02.05.2026 de hetê Şubeyê Eğitim Senî yê Erxenî ra bêrê eşkerakerdene û merasîmê xelatan zî do roja 09.05.2026 de Erxenî de virazîyo.
Tekilî (Îrtîbat):
Seba muracat û agahîyanê hîrayan, beşdarî eşkenê xo biresnê adres û hûmaranê telefonî yê ke afîşe ser o nuşte yê.