ZAZAKÎ NEWS - Festîvala Kultur û Xoza ya Mûnzûrî ke 24ê Temmuze de dest pêkerdbi, roja xo ya 4. de bi çalakîyanê cîyayan qedîya. Festîvala ke bi sloganê "Dêrsim cuye yo; destê xo mene xoza, îrade, ziwan û bawerîya mi" amebî viraştene, roja peyêne de bi çalakîyanê domanan, rayraşîyayîş û konserêk dewam kerd.
Çalakîya domanan
Roja peyêne ya festîvale de, Gerok Ma bi domanan reyde ame têlewe. Çalakîya ke Kuçeyê Hunerî de virazîya, tede resimê hunermendanê Kurdan ca girewt. Çalakîya ke tede boyaxkerdiş û kayê cîyayî estbî, domanan bi enstrumanan pîya lawikê Kurdkî vatî, govend kay kerd û wextê weşî vîyarnayî.
Rayraşîyayîşê seba tebîetî
Qedîyayîşê çalakîya Gerok Ma ra dima, Kuçeyê Hunerî ra hetanî Parka Mamekîye "Rayraşîyayîşê Derûdorî" ame viraştene. Temsîlkarê partîyanê sîyasîyan û sazîyanê cimatê sivîlî reyde xeylê welatîyî tewrê rayraşîyayîşî bîyî. Rayraşîyayîş de, bi çepik û tilîlîyan sloganê sey "Ma Dêrsim de maden nêwazenê" û "Mûnzûr azad o, do azad bimano" ameyî eştene. Rayraşîyayîş Parka Mamekîye de qedîya.
Konserê fînalî
Badê rayraşîyayîşî, Parka Mamekîye de konserêk ame dayîş. Bi seyan kesî tewrê konserî bîyî. Konser de hunermendî Civan Adar, Gölge Öztürk, Kadir Demir, Işik Berfin, Soner, Zaza Women û Semih Kavramak vejîyayî sehne ser. Konsero ke tede welatîyan wextê weşî vîyarnayî, bi govende qedîya.
