Emîne Şenyaşar a ke semedê edeletî çalakîya Nobeta Edaletî de ya vana: “Eno 2 serrîyo ke ez verê edliye de ya. Ez semedê her kesî edalete wazena.”
Çalakîya Nobeta Edaletî ya keyeyê Şenyaşarî ya verê Edliyeya Rihayî roja xo ya 816ine de dewam kena.
Qezaya Pirsûsî ya Rihayî de, merdimê parlamenterê AK Partî Îbrahîm Halîl Yildizî 14ê Hezîrana 2018î de keyeyê Şenyaşarî rê hêriş kerdbî. Netîceyê hêrişî de mêrde û 2 lajê Emîne Şenyaşarî ameybî kiştiş.
Emîne Şenyaşar her serê sibayî Pirsûs ra keyeyê xo ra vejîyena û şina verê Edliyeya Rihayî û serê derenceyan de dest bi Nobeta Edaletî kena.
Çalakîya aye de pankartê “Edalet” yeno akerdiş. Emîne Şenyaşar vana: “Eno 2 serrîyo ke ez verê edlîye de ya. Ser ra çend mewsimî vîyartî. Zereyê nêweşxaneyî de merdimê ma kiştê. Belkî ez zî biamêne kiştiş. Peyê înan de gedeyî mendî. Pa nêweşîya xwu ez tîya de nobeta edeletî gêna . Ez semedê her kesî edalet wazena.”
