Komara 79ine ya Kovara Vateyî neşir bîya.
Na hûmare de Oxir Sermîyan, Îdrîs Yazar, J. Îhsan Espar, Akman Gedîk, Menekşe Akalın, Şade Agon, Şukru Derîn, Akalin, Mihemed Kurdî, Hêvî Xebar, Resul Yıldırım, Mistefa Gomayij, Rojhelat Aktulum bi nuşte, meqale, şîîr û açarnayîşanê xo ca gênê.
Onca na hûmare de zî peynîya kovare de beşê rîpelanê kitabanê neweyan esto.
Kovara Vateyî
Serra 1996î de çend kirmancê ke bi kirmanckî (zazakî) nusenê û mintiqayanê cîya-cîyayan ra yê, paytextê Swêdî Stockholm de bi nameyê Grûba Xebate ya Vateyî yew grûbe ware arde (teşkîl kerde). Grûbe 1996î ra heta 2023î Ewropa û welat de 36 kombîyayîşî kerdî. Nê kombîyayîşan de qaydeyê rastnuştişî tesbît bîy û seba standardîzekerdişê nuştişê kirmanckî xebate bîye. Na xebate de, çekuyê ke ziwanê rojaneyî de tewr zêde ênê xebitnayene amey standardîzekerdene. 10.000î ra zafêr çekuyê bingeyênî û 60.000 varyantê înan amey etudkerdene û seba ziwanê nuştekî formê çekuyan yê standardî amey weçînitene.
Grûba Xebate ya Vateyî serra 1997î de kovara Vateyî weşanaye û na kovare heta nika 75 hûmarî vejîyaye. Nînan ra 20 hûmarê verênî Swêd de weşanîyay. Serra 2003 de ke Weşanxaneyê Vateyî Îstanbul de ame awankerdene êdî kovare hetê nê weşanxaneyî ra ameye weşanayene. Kovara Vateyî kovara kirmanckîya yekta ya ke 1997î ra hetanî 2023î, 26 serrî bêvind weşanê xo domnena û edebîyat û kulturê kirmanckî rê xizmet kena.
Nê endamanê Grûba Xebate ya Vateyî, redaksîyonê kovare de ca girewto:
1. M. Malmîsanij, serredaktorê kovare (1-34)
2. M. Selîm Uzun, redaktorê kovare (1-34) û (40-43)
3. J. Îhsan Espar redaktor (1-34) û serredaktorê kovare (44-…)
4. Haydar Diljen, redaktorê kovare (1-23)
5. Cemîl Gundogan, redaktorê kovare (1-4) û Mîzanpajê kovare: (1-20)
6. Munzur Çem, serredaktorê kovare (35-43)
7. Deniz Gunduz, redaktorê kovare (35-39)
8. Serdar Bedirxan redaktorê kovare (35-39)
9. Nadîre Guntaş Aldatmaz redaktora kovare (44-…)
10. Nureddîn Celalî redaktorê kovare (40-…)
Nuşteyê derheqê "Kovara Vateyî" de keyepelê resmî yê Vateyî ra ameyo girewtiş
