ZAZAKÎ NEWS -Hemvervatoxê Însîyatîfê Yewîya Demokratîke Gulcan Kaçmaz Sayyîgît û Mehmet Kamaç, ê ke bi rojnamegeran reyde ameyî têhet, prosesê aşitî ser o beyanat day û îfade kerd ke ganî dewlete zî cade gaman bierzo.
Însîyatîfê Yewîya Demokratîke, derheqê xebatanê xo û prosesî ser o qezaya Amedî Sûr de yew kafe de bi rojnamegeran reyde ame têhet. Vervatoxê Însîyatîfî Gulcan Kaçmaz Sayyîgît û Mehmet Kamaç û endamê însîyatîfî û xeylê rojnamegerî tewrê kombîyayîşî bîyî. Kombîyayîş de pankartê "Ma do bi yewîye ser bikewe" amey daliqnayîş.
‘Her kes paweno ke dewlete game bierzo’
Kombîyayîş de, verî Mehmet Kamaçî qisey kerd. Kamaçî qala xebatanê însîyatîfî kerde û da zanayîş ke nê prosesî de xebatê însîyatîfî muhîm ê. Mehmet Kamaçî îzah kerd ke sedemo en pîl o ke şarê Kurdî seserranê verênan de vîndî kerdo û wina va: “Seserra 21. de heqê ma çin o ke ma yewîya xo awan nêkerê. Ganî Kurdî binê versîyaya însîyatîfî de bêrê pêser. Prosesê ‘Aştî û Komelê Demokratîkî’ hêvî dayo heme Kurdan. Gamê ke ameyî eştiş, yew hetî ameyî eştiş. Birêz Ocalan rolêko tarîxî kay keno. Ne tena seba şarê Kurdî, seba heme şar û bawerîyanê Rojhelatê Mîyanênî hêvîyêk o. Ma bîyî şahidê roja tarîxî ya vêşnayîşê çekan. Her kes paweno ke êndî îqtîdar û dewlete game bierzo ke no proses ser bikewo. Wexto ke ser bikewo, do rojê aramîye virazîyê.”
Hêrişê HTŞyî şermezar kerdî
Mehmet Kamaçî bal ante serê hêrişanê HTŞyî yê vera cimatê Durzîyan û wina dewam kerd: “Sûrîye de çend aşmî verî bi hezaran Elewîyî ameyî qetilkerdiş, nika zî bi hezaran Durzîyî yenê qetilkerdiş. Ma nê hêrişan şermezar kenê. Ma wazenê ke heme şar û bawerîyî mîyanê aştîye de cuyê xo bidomnê.”
Mehmet Kamaçî peynî de da zanayîş ke ê do 26-27ê Temmuze de bi sloganê “Bi armancê yewîye ver bi aştîye” qezaya Agirî Bazîd de yew konferans virazê û nê konferansî do dîyarîya Ehmedê Xanî bikerê. Kamaçî her kes dawetê konferansî kerd.
‘Ewro ra tepîya ganî dewlete zî gamanê zelalan bierzo’
Ey ra dima, Gulcan Kaçmaz Sayyîgît zî da zanayîş ke eleqeyo ke seba kombîyayîşî esto, hêvîya înan a aştîye zêdeneno. Sayyîgît îzah kerd ke Kurdî modelêk vetê werte ke nika eşkeno seba dinya bibo nimûne û wina va: “Ayra ma nika behsê prosesê ‘Aştî û Komelê Demokratîkî’ kenê. Birêz Ocalanî serra 93î de zî behsê nê prosesî kerdêne. Dima ke bi birêz Abdullah Ocalanî reyde pêvînayîşî bîyî, proses seba heme dinya ame deklarekerdiş. Gamê ciddîyî zî ameyî eştiş. PKKyî adirbes îlan kerd, xo fesih kerd û tewr peynî zî Eşkefta Casenê ya Silêmanîye de çekê xo vêşnayî. Ewro ra tepîya ganî dewlete zî gamanê zelalan bierzo. Helbet, mesuldarîye tena ya dewlete nîya; ganî heme qismê cimatî yê Vakurî û Tirkiya mesuldarîya xo bîyarê ca. Sazîyê sivîlî ganî bi rayîrê komîsyonan uca de ca bigîrê û mesuldarîya xo bîyarê ca. Ganî komîsyon lez gaman bierzo.”
‘Ma her kesî dawet kenîm ke tewrê însîyatîfî bibo’
Gulcan Kaçmaz Sayyîgît qiseykerdişê xo wina qedîna: “Sedemê vîndîkerdişê Kurdan o se serran o yo ke yewîya xo nêviraşta. Ma her keso ke wazeno paştî bido nê prosesî, dawet kenê ke tewrê însîyatîfî bibo.”
