Grûba muhîman a muzîkê Kurdkî ra yewe Koma Amed, 30 serran ra dima Dîyarbekir de vejîya sehne. Konsero ke bi rayberîya Şaredarîya Bajarê Girdî ya Dîyarbekirî û Şaredarîya Qezaya Kayapinarî û bi organîzasyonê Sanatça ame viraştene, Parkê Newroze de virazîya. Hezaran kesî ameyî konser.
Konser bi mesajan akerd bi
Destpêkê konserî de mesajê hunermendan Şiwan Perwer, Hesen Şerîf, Hozan Şemdîn, Xelîl Xemgîn, Îlkay Akkaya, Hozan Dîlovan û Gulîstan Perwer ameyî wendiş. Nînan ra teber, mesajê sîyasetkaro tepişte Selçuk Mizrakliyî û Hemserekê verênî yê HDPyî Selahedîn Demîrtaşî zî ameyî goşdarîkerdene.
Mesajê Hemserekê verênî yê HDPyî Selahedîn Demîrtaşî yo ke Zîndanê Edîrne de tepişte yo û seba endamanê Koma Amedî şawitbi, wina yo: "Merheba embazê ercîyayeyî, ez Koma Amed ke pê vengê xo paştî dabî mucadeleyê estbîyayîş û çinêbîyayîşî yê şarê Kurdî silom kena. Ez hêvî kena ke ma rojanê azadan de bêrê pêser, seba her yewê şima cîya-cîya silamanê xo, heskerdişê xo û waştişanê xo yê serkewtişî şawena."
Hemşaredaran temaşekerî silom kerdî
Demanê averan ê konserî de, Hemşaredarê Şaredarîya Bajarê Girdî ya Dîyarbekirî Serra Bucak û Doğan Hatun û Hemşaredarê Şaredarîya Kayapinarî Berîvan Gulşen Sîncar û Cengîz Dundar vejîyayî sehne û temaşekerî silom kerdî.
Serra Bucake, qiseykerdişê xo de îfade kerd ke Koma Amed ‘agêraya keyeyê xo’. Bucake wina dewam kerd: “No hesret do emşo nê meydanî de biqedîyo. Hesretê 30 serran ê seba Koma Amedî, qedîyena. Wa hesreta aştîye, demokrasî û yewîye ya şarê Kurdî, ya dadîyanê ma yê ercîyayeyan zî biqedîyo.”
Sehne aîdê Koma Amedî bi
Qiseykerdişan ra dima, seba Rojîn Kabaîşe vengdayîşê edaletî ame kerdene. Dima ra, Koma Amed bi çepikanê girdan vejîyaye sehne.