Hunermendê Dêrsimijî Metin û Kemal Kahraman, semedê serrgêra 25. ya albumê xo yê 'Ferfecir'î Amed de konser da. Konserî rê eleqeyêko pîl estbi.

Metin û Kemal Kahraman semedê konserêkê taybetî yê albumê "Ferfecir"î, Merkezê Kongreyî yê ÇandAmedî de vejîyay sehne.

Konserî eleqeyê şarê Amedî pîl bi. Tîyatrokarî, hunermendê sînema, temsîlkarê partîyanê sîyasîyan û dezgehanê komelê sivîlî û zaf heskerdoxê muzîkî ameybî şewe.

Hunermendan kilamê xo bi sînevîzyono ke tede fotografê "Koç û Herb"î û "Xoza"yî estbîy, pêşkêş kerdî. Performansê birayanê Kahramanan hetê beşdaran ra zaf ame heskerdiş.

Wexto ke kilama namdare "Dewrano" amey vatene, salon de bi deqîqayan çepikî amey kuyene.

Kemal Kahramanî mîyanê konserî de qisey kerd û bale ante zehmetî û prosesê viraştişê albumê 'Ferfecir'î ser. Kahramanî teşekurê meymanan kerd ke ê tena nêverday.

Konsero ke tede hem kilamê Zazakî him zî Tirkî amey vatene, peynî de bi govendan qediya.