Rûsya de grûba Wagnerî teşebusê darbeyî kerd. Serekê Grûba Wagnerî va, ma vera artêşa Rûsya şer îlan kerdo. Serekdewletê Rûsya Putinî zî aşkere kerd ke, înan vera nê teşebusê darbeyî rewşa îstîsnayî îlan kerda.
Hetêk ra şerê Rûsya û Ukraynayê dewam keno, koma Wagnerî ke vera Ukrayna şer kerdêne ena hewe vera Artêşa Rûsya şer îlan kerd. Şewa bîne Rûsya eskerî bi panzêran kuçeyan rê cila bîyî.
Serekê grûba Wagner, Yavgeny Prigozhinî aşkere kerd ke, Encûmena Fermandarî ya Wagnerî qirarêk dayo û va: “Ê ke gedeyê ma kiştê, bîyê sebebê merdişê gedeyanê ma, ganî bizanê ke bêrê cezakerdiş û ganî hesab bidê. Wa kes nêvejyo verê ma.”
Serekê Wagnerî waşt wa Artêşa Rûsya nêvejyo verê înan . Prigozhinî venga şarê Rûsya da ke wa keyeyanê xo ra nêvejyê teber û êna va: “Ma dest de 25 hezar çekdarî estî. Kam wazeno bêro mîyanê ma berê ma akerde yo. Gere êyê ke şarê ma eştê mîyanê adirî hesab bidê ”
Beyanatê Kremlînî
Vervatoxê Kremlînî Dmitriy Peskov zî aşkere kerd ke xebera Vladîmîr Pûtînî sereka grûba Wagnerî esta û heme tedbîrî ameyê girewtiş.
Kişta bîne ra seredewletê Rûsya Vladimir Putinî zî derheqê enê bîyayîşan de beyanatêk da û va ke: “Grûba Wagnerî sere hewanayo û wazeno Rûsya de şerê xomîyanî vejo. Ayra Moskova de vera terorîzmî rewşa îstîsnayî îlan bîya. Ma do Rûsya bipawe û cewabê înan bide.”
