Diyarbekir de, Müjdat Gizligöl ke qasê 5 serran o sey Wekîlê Mudirê Muzeyî wezîfe kerdêne, wezîfe ra ame girewtiş. Gizligölî seba daşinasnayîşê muzeyanê Dîyarbekirî û zêdebîyayîşê hûmara zîyaretkerdoxan kedêka muhîme dabî.
Gizligöl bi xebatanê xo yê kulturî, çalakîyan û têkilîya xurt a ke rayaumûmîye de rona, ameyêne teqdîrkerdiş. Cayê ey rê Mudirê Muzeyê Xelatî (Ahlat) Mikail Erçek ame tayînkerdiş. No tayînkerdiş raştê razînêbîyayîşî ame.
Xeylê dormeyê kultur û hunerî yê bajarî vera nê qerarî vejîyayî, razînêbîyayîşê xo mojnay û îfade kerdî ke na vurîyayîş "bêwext û bêsebeb" o.
Ame vîrardiş ke demê Gizligölî de restorasyon, kampanyayê daşinasnayîşî û programê perwerdeyî yê seba domanan (gedeyan) ameyê kerdene û nê xebatî kulturê Diyarbekirî hîna zêde xurt kerdo. Coka ame vatene ke prosesêko wina de vurîyayîşê wezîfeyî "nêno fehmkerdiş".
Sêwregi ra yo û Zaza yo
Pawîyeno ke Mikail Erçek demêko nêzdî de Diyarbekir de dest bi wezîfeyê xo yê neweyî bikero. Hetê bînî ra ame musayîş ke Gizligöl do binê banê eynî dezgehî de, wezîfeyêko bîn de xebatanê xo rê dewam bikero.
Bajar de persa ke meraq bena na ya: Nameyo ke demêko serkewte vîyarna, çira wezîfe ra ame girewtene?
Heto bîn ra zanîyeno ke Müjdat Gizligöl eslê xo Sêwregi ra yo û Zaza (Dimilî) yo.
