ZAZAKÎ NEWS - Serekê Herêma Kurdîstanî Nêçîrvan Barzanî, merasîmê çekveradayîşî yo ke PKK ewro Silêmanîye de viraşt, sey "gamêka muhîme û weşkerdoxe ya seba serkewtişê prosesê aştîye" name kerd. Barzanî, hesabê xo yê fermî yê X'î ser o sipasîya xo Serekkomarê Tirkiya Erdoganî rê arde ziwan û va, ê bi hurmet ewnîyenê rolê Dewlet Bahçelî û Abdullah Ocalanî ra.
Merasîmê çekveradayîşî yo ke PKKyî Eşkefta Casenê ya tarîxîye de viraşt û Hemsereka Konseya Rayberdişî ya KCK'yî Besê Hozat tewr bîye, herême de vengêko pîl vet. Serekê Herêma Kurdîstanî Nêçîrvan Barzanî eşkerayîyêka nuştekîye vila kerde.
"Prosesî do bero yew qonaxêko newe"
Nêçîrvan Barzanî, eşkerayîya xo ya nuştekîye de va ke ê bi keyfweşîye pêşwazîya merasîmî kenê. Eşkerayîye de ame vatiş ke: "Ma bawer ê ke na game do prosesê aştîye bero yew qonaxêko newe û dima ra zî do gamê bînî yê pratîkî bêrê eştiş."
Nêçîrvan Barzanî va, "Ma sipasî û teqdîrê xo seba teşebus, paştîdayîş û hewldayîşanê ey ê seba serkewtişê prosesê aştîye, reyna pêşkêşê Birêz Serekkomar Erdoganî kenê."
Nêçîrvan Barzanî, da zanayîş ke herême yew prosesêko hesas ra derbas bena û peynîya eşkerayîya xo de wina va: "Aştîye de her kes qezenc keno û serkewtişê aştîye xizmetê Tirkiya, heme herême û heme hetan keno."