ZAZAKÎ NEWS - Weşanxaneyê Vateyî ra kitabêdo newe, kitabê Mihemed Kurdî "Serebûtê Ma" ame weşanayene. Mihemed bi eslê xo kurmanc o û kirmanckî/Zazakî peycû musayo û serde zî bi zazakî kitab nuşto.
Mihemet Kurdî derheqê kitabe xo de Zazakî Newsî rê qisey kerd û wîna va:
“Kitabê ma, pancas serebûtan ra yeno pê. Serebût: Ma çîyanê ke mîyanê şarî de qewimîyayê û raştîya ci esta rê vanê "serebût". Kurdê Kurmancî ci rê vanê "serpêhatî". Yew xususîyetê serebûtan zî o yo ke tede seba komel û şarî şîretî estê. Zafaneyê serebûtanê ke mi arê dayê; mi embaz û dostanê xo yê Vakur, Başûr û Rojawanê Kurdîstanî ra eşnawitê û nuştê.
Ez şeş aşmî kitabî ser o xebitîya û mi serra 2024î de dosyaya xo amade kerde, la semedê problemanê weşanxaneyî ra zaf erey çap bi. Mi xo sey Kirdêko Kurmanc bê zaravaya Dimilkî/Zazakî kêmî vînayêne; aye ra semedo ke ez nê kêmasîyê xo sererast bikerî, mi serra 2021î de dest bi musayîşê Zazakî kerd. Dima ke mi xetereya serê Zazakî dîye, ez hîna zerrî ra xebitîya û mi sozêk da xo; mi va 'eke ez rojêk kitabêk binusî, ganî bi Zazakî bo.'
Reyna mi waşt ke ez bi na xebate şarê (Kurdê) ma rê bivajî ke, eke ma zerrî ra biwazê ma eşkenê zaravayanê yewbînan bimusê. Mi goreyê zanayîşê xo, seba ke heme kes ci ra fam bikero, ziwanêko standard xebitna."
Mihemed Kurdî kam o?
"Mihemed Kurdî serra 1991 de ameyo dinya. Mihemed nika Mêrdîn de ciwîyeno la eslê xo de qezaya Cirnê Reş/Hîlwan ra yo. O sey xebatkar bi serran başûrê Kurdistanî de mendo û bi dîyalektanê Kurmanckî/Kirdaskî û Sorankî zî zaneno. Serra 2020 ra dima eleqeyê xo dano ziwanê Kurdkî ser û heta nika zaf maqale û nuşteyê ey kovaranê sey “Şewçila, Vate, Ma’z Êst” de, ancî roynameyanê sey; “Xwebûn, Yenî Özgür Politika” de, inahawa keyepelanê sey “Zazakî News, Ajansa Welat, Înstûtîya Kurdî Li Stockholme” de bi dîyalîktanê Kirmanckî/Zazakî, Sorankî û Kurmanckî neşir bîyî û hema zî benê. Reyna mîyanê zaf xebatanê ziwanî de ca girewto û hema nika zî mîyanê çend komanê ziwan û wendişî de bi awayêko feal ca gêno û ancî dîyalekteta Kurmanckî de karê edîtorî û redaksîyonê kitaban keno."
Enwer Yılmaz