Serekê Pêroyî yê CHPyî Özgür Özelî wesîleya Roja Dadîyan ra, dadîya Gülistan Doku aya ke Dêrsim de bibî vîndî Bedriye Doku pê telefon pers kerd.
Özgür Özelî hetê bînî ra dadîya Berkîn Elvanî o ke çalakîyanê Gezî de amebi kiştiş Gülsüm Elvan, dadîya Ali İsmail Korkmazî o ke çalakîyanê Gezî de amebi qetilkerdiş Emel Korkmaz û dadîya Oğuz Arda Sel, Mısra Öz zî pê telefon gêra û roja înan a dadîyan bimbarek kerd.
Gülistan Doku Dîyarbekirij a û 4ê Çeleyê 2020î de wexto ke Dêrsim de unîversîte wendêne bibî vîndî û a roje ra nat aye ra xeberêke çin a. Keyeyê aye çi Dêrsim çi bajaranê bînan de hetanî Meclîsê Tirkîya hesabê vîndîbîyayîşê aye pers kerd la heta nika nêeşka tu encamêk bigîro.
