Pawîyeno ke Serekê Meclîsî yo verên Bulent Arinç, dima ke qerarê Mehkemeya Heqanê Merdiman a Ewropa (MHME) qetî bi, ewro Hemserekê verênî yê HDPyî Selahedîn Demîrtaşî Zindanê Edîrne de zîyaret bikero.
Bulent Arinçî, rojanê verênan de eşkerayîya ke dabi de referans daybi vateyanê Bahçelî û îlan kerdbi ke o do 11ê Teşrîna Peyêne 2025 de Selahedîn Demîrtaşî û karsaz Osman Kavalayî zindan de zîyaret bikero.
Serekê Pêroyî yê MHPyî Devlet Bahçelî, hewteyo verên dima kombîyayîşê grûba MHPyî ra dima, persa derheqê veradayîşê muhtemelî yê Demîrtaşî ser o vatibi: "Bi rayîranê huqûqîyan netîce ameyo girewtiş, veradayîşê ey do seba Tirkîya bibo wesîleyê xeyran."
Serekkomarê Tirkîya Recep Tayyîp Erdoganî zî, dima ke Bahçelî eşkerayîye daye, cewabê persa ke reyna hetê rojnamegeran ra ameye perskerdene de, vatibi: "No welat yew dewleta huqûqî yo, qanûn se vajo, o beno."
Mehkemeya Heqanê Merdiman a Ewropa (MHME), îtîrazê Tirkîya yê derheqê veradayîşê Selahedîn Demîrtaşî de red kerdbi û bi no qayde qerarê MHMEyî yê veradayîşî qetî bibi.
Pawîyeno ke Tirkîya ke mîyanê ê welatanê ke qeraranê MHME nas kene ya yew a, nê qerarî bica biayro. Avûkatanê Demîrtaşî, goreyê qerarê MHME, seba ke bêro veradayîş, muracatê Mehkemeya Îstînafî ya Anqara kerdbi.
