MEB-DERî abîyayîşê demê perwerdeyî de Dîyarbekir de beyanatêk da çapemenî û waşt wa ziwanê Kurdî Tirkîya de bibo ziwanê perwerdeyî, mekteban de bi ziwanê Kurdî (Kurmanckî-Zazakî) perwerde bêro dayîş.
Beyanatê MED-Derî de vajîya ke: ''Bi mîlyonan gedeyê kurdan ziwan, heqîqet, nasname û kulturê xo ra yenê dûrîvistiş Vera înkarkerdişê kurdkî ganî ma vengê xo berz bikerê.''
Amed de Komeleya Cigêrayîşê Ziwan û Kulturê Mezopotamya (MED-DER), bi waştişê perwerdeyê ziwanê dayîke Parka Koşuyolu ya Rezanî de eşkerayî da. Îdarekarê ÎHD, Egîtîm Sen, Komeleya Ekolojî,TMMOB DBP,TUHAY DER, OHDyî yê bajarî û xeylêk kesî beşdarê eşkerayî bîyî.
Metnê çapemenîye hetê îdarekara MED-DERî Dîlane Guvenç ra ame wendiş. Eşkerayî de wîna ame vatiş: ''Goreyê madeyê 42yî yê qanûnê Tirkîya mektebanê dewlete de têna perwerdeyê tirkî est o. Gedeyê kurdan reyna ziwanê dayîke ra mehrum yenê verdayîş. Bi mîlyonan tutê kurdan ziwan, heqîqet, nasname û kulturê xo ra do bêrê dûrfînayîş. Wextê ronayîşê Komera Tirkîya ra nata şarê kurdî tim raştê înkar û çînhesibnayîşî yeno. Kurdî tim cehd kenê ke ziwan, kultur û erjanê xo yê mîlîyan bipawê. Bi mîlyonan domanê kurdan wazenê ziwanê dayîke de perwerde bivînê, ziwanê xo de biwanê, xeyalanê xo ziwanê xo de bivînê, şîîranê xo ziwanê xo de biwanê, romananê xo bi ziwanê xo binusê."
