Mihemed Kurdî

Ma Kurdî hetê şerî de şarêko cengawer û jêhatî yê labelê hetê sîyasî û dîplomasî de zî zaf zeîf ê. Heta nika ma Kurdan hetê leşkerî ra vera duşmenan de serkewtişê zaf pîl bi dest vistê la çi heyfo çîyê ke ma şerî de bi gonîya şehîdanê xo dest fînenê ma nêeşkenê mase ser o bipawê û bikerê statûya mende.

Eno rewşê tehl yanê "şerî de serkewtiş, sîyasetî de têkşîyayiş/vîndîkerdişê" raştîyêka ma ya tarîxî ya û hema nika zî dewam keno. Eke ma biewnî des seranê peyênan ma do bi awayêko zelal ena raştîya xo ya tehl (şerî de serkewtiş, sîyasetî de têkşîyayiş/vîndîkerdişê) bivînê. Seke dinya pêro zanenê hêzê sereke yê ke vera Daîşî de bi qehremanî şer kerdê û ê têk berdê hêzê ma yê Kurdî bî. Bi arizî zî Rojawan û Başûrê Kurdistanî de hêzê Kurdan semedê pawitişê şar û welatê xo şerê vera Daîşî de şehîd û bedêlên zaf giran dayê. La çi heyfo ke peynî de ancî sîyasetê ma hard û şaristanê ke şervanê ma bi gonîya xo pawitê teslîmê hikumetê Sûrîye kerd û Kurdî bê statû veradayê.

Reyna sîyasetê ma, şaristanê Kerkûkî ke hêzên Kurdan galeyê Daîşê ra pawitê vernî de serra 2017î de teslimê hêzanê Heşda Şehbî kerdê û tewr peynî de zî hewteyê binî walîtîyê Kerkûkî ke teslimê tirkmenan kerd. Yanê Başûr de zî seke Rocawanî deskewteyê ke ma bi gonîya şehîdanê xo bi dest vistê bîyê qurbanîyê sîyasetî, eno zî mojneno ke hetê sîyasî de aqilêkê ma yo stratejîk çino.

Gelo Doza Şima Çiyo, Şarê Ma Çirê Hendê Şehîd Dayê?

Ewro ê Kobanî û Rocawayê ke hunermendanê ma ser o bi seyan lawik û deyîr vatê û wendê, nuştoxanê ma ser o bi seyan kitabî, roman, hîkaye, estanikî nuştê û şaîranê ma ser o bi seyan helbest riştê bê statû û binê destê duşmenan de nalayenê. Ancî o Kerkûkê ke zerrîya Kurdîstanî ya û Mam Celalî zî verê cû cira vatibi "heta ke yew Kurd bimano/a Kerkûk şaristanê Kurdîstanî yo" ewro binê kontrolê hêzê Heşda Şehbî û walîyê turkmen de yo. Ena ray gelo semedê çi şarê ma hende şehîdî dayê? Helbet şarê ma zî û ê şervanê ke nê rayîrê ser o şehîd û gazî bîyê zî semedo ke şima îrade û deskewteyên ma teslimê duşmenan bikerê hende bedêlê giranî nêdayê, înan tenya semedê ziwan, hard û azadîya welatê xo hende bedêlê giran dayê. Bêguman enê raverşîyayişên ke Rocawan û Başûrê Kurdistanî de qewimîyayê bîyo semedê bêzarî û bêhêvîbîyayişê şarê ma. Êdî sîyaseto xelet ver bawerîya şarî bi partîyanê sîyasî zaf kemî bîyo, heta nika ma Kurdan zaf zehmetî û tengayî dîyê û ciwiyayî la çi rey ez nêbîya şahid ke şar seke nika bêhêvî mendibî.

Semedê Têkşîyayişê, Bêtifaqîye Yo

Bêguman eke sîyasetî de aqil û polîtîkayêkê ma yê stratejîk bibîyêne ma do vera duşmenan de bihêzêr bibîyêne û rewşê ma zî do yê nikayîn rê zaf başêr bibîyêne. Partîyanê ma yê sîyasî bi çimê neteweyî nêewnîyenê meseleyan ra, no semed ra şinê her kes û hetî reyde tifaqa xo virazenê la yewbînan reyde, yanê birayê xo yê ke gonîya ey/aye ra yê nêvirazenê. Sey nimûne, Kerkûk bi serran o ke meseleyêke ma yê neteweyî yo, ena rey eke PDK û YNK yê pîya bikerdêne Kerkûk do ewro destê Kurdan de bimendêne û vera duşmenan de destê hetê Kurdan do xurt bibîyêne. La semedo ke her di hetî (PDK û YNK) zî sîyasetê xo duşmenîya yewbînan ser o awan kenê şinê Ereb û tirkmenan reyde tifaqê xo virazenê.

Reyna 2014î de gama ke Daîşê galeyê ci kerd, Kobanî semedê ma bîyo meseleyêke neteweyîye. Dima hêzê Pêşmergeyî ameyê hetkarîya hêzê YPG û her di birayan pîya Daîş Kobanî de têk berd. Ena ray eke azadkerdişê Kobanî ra dima hêzê YPG û pêşmergeyê Roj binê alaya rengîn de armanc, doz, soz û hêzê xo bikerdêne yew do ewro statûyê Rocawanî Kurdistanî zî mende bimendêne û şarê ma zî hende zulm nêvînayêne. La partîyanê ma yê Rocawanî (PYD û ENKS) zî sey ê Başûrî sîyasetê xo duşmenîya yewbînan ser o awan keno, coka ra wirdî zî şinê Esadî, Oso û Qolonîyî reyde tifaqê virazenê. Seke nê numûneyan de zî aseno duşmenîya partîyên sîyasî yê vera yewbînan de bîyo semedê têkşîyayişê ked û têkoşîna şar û welatê ma.

No semed ra ganî her kes baş bizano çi havilê nê sîyasetê vengî, Kurdî û Kurdistanî rê çin o, eke înan (partîyên ma) sîyasetê xeletî de israr bikerê û xo serreraşt nêkerê do paştîya ke şarî rê ginê bi temamî vîndî bikerê.

Eke partî û sîyasetkarê ma wazenê welatê ma azad bikerê, o çax gani fek duşmenîya yewbînan ra veradê û meseleyên neteweyî de tifaqê xo virazê. Xo vîra mekerê eke ma duşmenê xo ra zanayêr nêbê, yanê eke mezgê ma yê sîyasetê yê duşmenan rê başêr nêbê ma do her tim vîndî bikerê.