ZAZAKÎ NEWSA - Goreyê raporê Platforma "Ma Do Cinayetanê Cinîyan Vinderne", 6 aşmanê verênan ê serra 2025î de, Tirkîya û Bakurê Kurdîstanî de tewr tay 136 cinîyî hetê camêrdan ra ameyî kiştene.

Platforme, ke hûmaranê cinayetanê cinîyan eşkere kerdî, da zanayene ke tena aşma Hezîrane de 15 cinîyî ameyî kiştene û 26 cinîyî zî bi hawayêko "bişuphe" merdê. Rapora 6 aşman de, hûmara mergê bişupheyan 145 a.

"Cinîyî tewr zaf keyeyanê xo de yenê kiştene!"

Temsîlkara Platforma "Ma Do Cinayetanê Cinîyan Vinderne" Ezîn Îzel Uysale detayê raporî pare kerd û wina va:

  • 96 cinîyî hetê yew endamê keyeyî yo camêrd ra ameyî kiştene.
  • 15 cinîyî hetê camêrdanê sûcdaran ra ameyî kiştene.
  • 9 cinîyanê ke ameyî kiştene, derheqê înan de qerarê pawitişî estbi.
  • %65ê cinîyan keyeyanê xo de û %35 zî hetê mêrdeyanê xo ra ameyî kiştene.

Tewirê kiştişî:

Goreyê raporî, cinîyê ke 6 aşman de ameyî kiştene, bi nê hawayan ameyî kiştene:

  • 78 bi çekan
  • 36 bi kardî
  • 11 bi xeniqnayîşî
  • 6 bi pirodayîşî (darb)
  • 3 zî bi veşnayîşî
  • Hema zî nêameyo dîyarkerdene ke 2yê nê cinîyan senî ameyê kiştene.