Wezaretîya Weşîye ya Tirkîya sîstemê "e-Reçetem"î de panc ziwanê bînî zêde kerdî la ca nêda Kurdkî.
Wezîrê Weşîye yê Tirkîya Fahrettîn Kocayî vizêr aşkere kerdbi ke, semedê sîstemê e-Reçetemî panc ziwanê bînî ameyê zêdekerdiş.
Labelê ziwanê Kurdan ke Tirkîya de milyonan kesî qisê kenê çin o.
Vera na kerdena hukmatî reaksîyonî zî zêde benî. Înan ra yew zî Parlementerê CHPyî yê Amedî Sezgin Tanrıkulu yo.
"Çira Kurdkî çin a ?”
Tanrikuluyî hesabê xo yê Tiwitterî ser ra wîna va:
“Bi milyonan welatiyê ma estê ke ziwanê înan Kurdkî yo û sîstemê e-Reçetemî de canêdayîşê Kurdî nêno qebûlkerdiş. Îta ra zî fam beno ke nêwazenê problemanê şarê Kurdî safî bikê. Hetê ra zî nêwazenê wa Kurdî bi ziwanê xo xizmetê weşîyê bigîrê. Sîstemo ke tede Ruskî û Erebkî esto de çira Kurdkî çin a?”
Kişta bîne ra HDPyî zî ser hesabê xo yê Tiwitterî ra Kurdbîyayîşê Fahrettîn Kocayî vist vîr û va: “Wa xêrîn bo la çira şima ca nêdayo Kurdî zî, kurdî kotî der a? Kurdê ke paştî danê AKPyî gelo şima na perse persenê? Birêz Fahrettin Koca qet nêbo ti wayîrê ziwanê xo bivejîyêne.”
