Ame eşkerakerdiş ke pêvînayîşo ke mabênê Partîya DEMî û AK Partî de plan bîyo, do 20ê Kanûne de seat 14.00 de bêro viraştiş. Partîya DEMî vizêr AK Partî û Wezaretê Edaletî ra randevû waştbî.
Proseso ke dima ke Serekê Pêroyî yê MHPî Devlet Bahçelîyî destê wekîlanê Partîya DEMî girewtbî dest pêkerdo dewam keno.
AK Partî ra Huseyîn Yayman, MHP ra Fetî Yildiz û DEM Partî ra Gulîstan Kiliç Koçyîgît şîbîy Îmrali û Rayberê PKKyî Abdullah Ocalanî reyde pêvînayîş kerdbî. Pêvînayîş de CHP û Partîya Yenîyolî ca nêgirewtbî.
Heyetê Partîya DEMî, dima pêvînayîşê bi Ocalanî, Serekê Pêroyî yê Partîya DEVAyî Alî Babacanî zî zîyaret kerdbî.
Heyet, 11ê Teşrîne de Meclîs de bi Serekê Pêroyî yê MHPî Devlet Bahçelîyî reyde ame pêser. Dima pêvînayîşî Pervîne Buldan a DEM Partî cewab dabî persan û îfade kerd ke "înan bi Bahçelî reyde pêvînayîşêko bitesîr viraşto". Bahçelîyî zî vatbî, "Pervîne Xanime her babete eşkera îfade kerde. Ez îmzayê xo erzena binê her cumleya ci."
Pêvînayîşo ke plan bîyo ke mabênê heyetê Partîya DEMî û CHPyî de bêro kerdiş, semedê mergê Sereka Şaredarîya Şehzadelerî Gulşah Durbaye ra amebî peyeştiş.
