ZAZAKÎ NEWS - Hunermendo Dêrsimij o namdar Mikaîl Aslanî eşkera kerd ke Unîversîteya Hunerî ya Berlînî bi behaneya "sîyasîbîyayîşî" salonê konserî nêdayo ey. Aslanî, no muamele sey "sansur " name kerd û derheqê mesele de qisey kerd.
Mikaîl Aslanî da zanayîş ke berpirsîyara salonanê konserî ya Unîversîteya Hunerî ya Berlînî Nadda Tarabichî bi rayîrê e-postayî ey rê wina vat: "Seba ê hunermendanê ke cîyakerîye virazenê ya zî têkilîya înan bi hetêkê sîyasî reyde esta, firsend çin o."
“No sansur o û nêno qebulkerdene”
Mikaîl Aslan, o ke hemwelatîyê Almanya yo zî va " No Tirkiya de zî sey yew bahane vera hunermendan yeno şuxulnayene
“Ez temsîlê mîrasê Zazakî kena. No cewab sansur o û nêno qebulkerdene. Ganî ma naye qebul nêkere. La ma bi tena nîyê, rêxistinê sey Cimatê Kurdan ê Almanya zî kewtî dewre..”
Aslanî platformanê xo yê medyaya sosyale ser o zî razînê bîyayîşê xo ardbi ziwan û vatbi: "Êyê ke odeyanê xo de ca danê antîsemîtîzmî la muzîkê Kurdkî-Kirmanckî qedexe kenê, di rî yê. Gelo lawikê ke eşq, aştî û weşîya welatê mi yê Kurdan ser o yê, eşkenê bibê sebebê polarîzebîyayîşî? Wina aseno ke Unîversîteya Hunerî ya Berlînî wayîrê nê tewirê skandalî vejîyena."
