Pisporê warê Ziwan û Edebîyatê Zazakî Dr. Murat Varol o ke Enstîtuyê Ziwananê Ganeyan yê Unîversîteya Çewlîgî de mudir o, da zanayîş ke programê perwerdeyî yo newe yo ke seba Zazakî ameyo hadrekerdiş, ameyo qebulkerdiş. Bi nê programo ke mîyanê Modêlê Maarîfî yê Seserra Tirkîya de ameyo hedrekerdiş û nêzdîyê 200 rîpel o, Zazakî do programanê perwerdeyî yê MEBî de sey ziwanêko xoser ca bigîro.
Pisporê warê Ziwan û Edebîyatê Zazakî Dr. Murat Varolî hesabê xo yê medyaya sosyal de parekerdişêk kerd û da zanayîş ke programo newe ameyo qebulkerdiş.
Program 200 rîpelan ra virazîyeno
Goreyê malumato ke Varolî day, destpêkê serra 2026î de bi akademîsyenanê Unîversîteya Çewlîgî, Unîversîteya Munzurî û Unîversîteya Anqara û malimanê Zazakî yê ke mîyanê Serekîya Perwerdeyê Millîye ya Çewlîgî de xebityêne, komîsyonêk ame ronayîş.
Hetê komîsyonî ra mîyanê Modêlê Maarîfî yê Seserra Tirkîya de seba Zazakî programêko xoser yo ke nêzdîyê 200 rîpelan o ame hazirkerdiş. Programo ke ame hazirkerdiş, badê gureyanê resmî, pêşkêşê Serekîya Sura Talîm û Terbîyeyî (TTKB) ame kerdiş û ame qebulkerdiş.
Kitabê dersan do newe ra bêrê nuştene
Badê qebulkerdişê programê neweyî, newe ra hazirkerdişê kitabanê dersan ê Zazakî yê ke seba sinifanê 5, 6, 7 û 8. yenê musnayîş zî goreyê mufredatê neweyî yeno plankerdiş.
Perwerdeyê Zazakî de do çi bibedilyo?
Goreyê parekerdişê Dr. Murat Varolî, bi nê qeydeyanê neweyî, perwerdeyê Zazakî de nê bedilnayîşî do bêrê kerdiş:
- Zazakî do mîyanê Wezîrtîya Perwerdeyê Millîye de sey ziwanêko xoser ca bigîro.
- Kitabê dersan ê Zazakî yê seba sinifanê 5, 6, 7 û 8. goreyê mufredatê neweyî do newe ra bêrê hazirkerdiş.
- Mîyanê modûlanê weçînayîşê dersan yê MEBî de Zazakî do bi hawayêko xoser bêro mojnayîş.
- Branşê Zazakî do bi hawayêko xoser bêro qeydkerdiş.
- Seba malimîya Zazakî, tena êyê ke beşa Ziwan û Edebîyatê Zazakî qedînayê eşkenê muraceat bikerê.
Varolî parekerdişê xo de hêvî kerd ke no dewrê neweyî seba Zazakî û kesê ke kede danê nê ziwanî xeyrên bo.
