Fatma Yımaz / Amed
Verê aşma Remezanî, semedo ke hadrekarîya xo bikero şarê Dîyarbekirî verê xo dayo bazaran û keno ke çî-mîyanê werdişî tay bo zî ercan bigîro.
Labelê bazaran de zî êdî çîyo ercan o ke ti bierînî çin o.
Semtê 500 Evlerî yê Dîyarbekirî de her roja pancşemeyî bazar yeno ronayîş.
Wexto ke ti ewnîyenî bazarî ra se ra neway cinîyî destê înan de erebeyê bazarî serê dezgeyan de gêrenê. Semedo ke tay ercan bigîrê, bazarcîyan dir bazarîye kenê. Cayo ke zewze bîyo ercan de qelebelixê cinîyan uca de zêdîyeno.
Û verê şanî de zî kesê ke qet pereyê înan çin ê yenê çî-mîyê ke hetê bazarcîyan ra ameyê rijnayîş yan zî helesnayî yê arêdanê û benê keyeyanê xo.
Şêlikê semtê 500 Evlerî zî, bazarcîyî zî halê xo ra razî nîyê. Şar vano, her çî vay o ma nêeşkenê bierînê, bazarcî zî vanê, ma nêeşkenê malê xo roşê û debara keyeyê xo bikê.
Verê aşma Remezanî her çî bîyo vay
Cinîyê ke bazar de gêrenê, sehnenê la nêeşkenê goreyê zerrîya xo sewze û fêkîyan bierîne Zazakî Newsî rê wîna vanê “ Çend rojî badê Aşma Remezanî dest pêkena. Ma zî semedê hadrekarîye aşma bimbareke ameyî bazar. La ma dî ke sey her serre emser zî verê na aşme her çî bîyo vay. Tay sewzeyî bîyê 2 qat. Xora îmkanê ma çin o ma destteng ê. Bazarcî zî na aşme xo rê kerdê firsend û çîyan kenê vay. Xora ma her hewte yenê xo rê çî-mîyanê werdişî gênê. Çîyo ke ma gênê ma rê hewteyêk nêvejeno. Ma her çî kêmî gênê.”
Bazarcîyî zî semedê vaybîyayîşî vanê, ma zî şinê Halê sewzeyan ra gênê. No hewte ma şîyê la ma vîna ke her çî bîyo vay. Ma zî mecbûr ê bigîre. Xora rotiş zî nêbeno. Ma öend bazaran gênê encax malê xo roşenê.
