Wezîrê Edaletî derheqê Demîrtaşî de qisey kerd: Qerar destê mehkeme de yo

Wezîrê Edaletî yê Tirkîya Yilmaz Tunçî, Anatalya de rojnamegeran rê qisey kerd û behsê qerarê Mehkemeya Heqanê Merdiman a Ewropa yo derheqê Selahedîn Demîrtaşî de kerd.

Yilmaz Tunçî da zanayîş ke qerarê Mehkemeya Heqanê Merdiman a Ewropa hetê Dayîreya Cezayî ya 22. ya Mehkemeya Herême ra do bêro ercnayîş û wina va:

"Senî ke şima pêro zanê, Mehkemeya Cezaya Girane ya 22. ya Anqara, 16ê Gulana 2024an de ceza dabî Demîrtaş û embazanê ey. Tayê mehkûman ceza girewt û tayê zî ameyî veradayîş. Nika na dosya Dayîreya Cezayî ya 22. ya Mehkemeya Herême ya Anqara (Îstînaf) de yena ercnayîş.

Mehkemeya Heqanê Merdiman a Ewropa (MHME) muracatê seba ‘binpaykerdişê heqê azadî û ewlekarîye’ û ‘binpaykerdişanê pabesteyê tepiştişî’ ser o qerarê binpaykerdişî da. Nê prosesan de ma wazenê ke wa qerarê dayîre, Dayîreya Pîle ya Pêroyî de bêrê ercnayîş.

Qerarê dayîre nika hetê Dayîreya Cezayî ya 22. ya Mehkemeya Herême ra do bêro ercnayene. Mehkemeya herêmî ceza da Demîrtaşî û dosyaya ey nika Îstînaf de ya. Ercnayîşê na babete nika verê mehkeme de yo. Ma do pêro pîya bivînê ke mehkeme do çi qerar bido."

Yilmaz Tunçî ard ziwan ke Demîrtaş û embazê ey Dewaya Kobanê de ameyê mehkûmkerdiş û nika dosya prosesê îstînafî de ya.