ZAZAKÎ NEWS - Komîteya Hadrekare ya Festîvala Mûnzûrî, nîqaşan ra dima eşkera kerd ke koma "Zaza Women Music Project" do roja yewşemeyî vejîyo sehne ser. Kome îdîa kerdbi ke ê seba ke nameyê înan de 'Zaza' esto, program ra ameyê vetiş.
Dêrsim de, Festîvala Kultur û Xozaye ya Mûnzûrî bi sloganê "Dêrsim Cuye yo; destê xo mene xoza, îrade, ziwan û bawerîya mi!" dewam kena. Labelê, semedo ke festîvale de ca nêdîyabi koma “Zaza Women Music Project”î no bibi sebebê nîqaşanê pîlan.
Kome, eşkerayîya xo ya 20ê aşme de îdîa kerdbi ke komîteya festîvale seba vateyê "Zaza"yî yo ke nameyê kome de yo, muracatê înan red kerdo. Endamanê kome eşkera kerdbi ke muracatê înan verî qebûl bîyo la dima ra înan rê ameyo vatene ke "ê eşkenê bi hawayo ferdî vejîyê sehneyî ser la nêeşkenê bi nameyê kome beşdar bibê."
Komîteya Festîvale uzrê xo waşt û kome dawet kerde
Dima ke nîqaşî pîl bîy, Komîteya Amadekerde ya Festîvala Kultur û Xozaye ya Mûnzûrî eşkerayîyêk vila kerde û şarî ra uzrê xo waşt.
"Koma Zaza Women Music Project do vejîyo sehne ser"
Bi çareserkerdişê problemî, Komîteye eşkera kerd ke “Zaza Women Music Project” do roja yewşemeyî çarçewaya festîvale de vejîyo sehne ser û wina va:
“Koma ma ya Zaza Women Music Projectê do çarçewaya çalakîyanê Festîvala Kultur û Xozaye ya Mûnzûrî de roja yewşemeyî, 27ê Temmuza 2025î vejîyo sehneyî ser.”
