Zelandaya Newîye seba Mayanê Şemeyî Erdoganî rê mektube erşawit
39 parlamenterê Zelandaya Newîye, seba çalakîya Mayanê Şemeyî ya ke do 25ê gulane bêra kerdene, serekkomarê Tirkîya Recep Tayyîp Erdoganî rê mektube erşawit.
Parlamenterê Partiya Karkeran a Te Atatuya Zelandaya Newîye, Vervatoxê Koç, Bêçekkerdişî û Kontrolê Çekan û Hetkarê Karûgureyê Teberî Hon Phil Twyford mektuba ke ameya hadekerdiş hesabê xo yê medya dîjîtale ser ra semedê Mayanê Şemeyî Serekkomarê Tirkîya Tayyîp Erdoganî maktubêke erşawit.
Twyfordî waşt semedê çalakîya hewteyê 1000î yê Mayanê Şemeyî destûr bêro dayîş û înan rê neheqî nêra kerdiş. Twyfordî da zanayîş ke mektuba ke înan erşawita de îmzaya 39 parlamenteran esta.
Hurmet nîşanê demokrasî bidêne
Mektube ke wîna vajîyeno: “39 Parlamenterê Zelandaya Newîye Serekkomarê Tirkiya ra waşt wa hukmatê ey qerarê Mehkemeya Qanûnê Bingehînî yo ke derheqê Mayanê Şemeyî de dîyayo rê hurmet bikero. Mayê Şemeyî semedo ke merdimanê xo yê vîndîbîyayeyan ca bikerê 29 serrîyo ke xo ver danê, vengê xo berz kenê . Mitîngê Mayanê Şemeyî yo ke 25ê gulane Meydanê Galatasarayî de do bêro kerdene gereke rastê tacîzê polîsan nêro, seba viraştişî destûr bêro dayene.”
Heto bîn ra hunermend Teoman o ke muzîkê Tirkî de namdar o semedê hewteyê 1000 yê çalakîya Mayanê Şemîyan de deyîra "Benim Annem Cumartesi" wend û platformanê dijîtalan ser ra vila kerd.
