ZAZAKÎ NEWS - Amed de vewra ke şan dest pêkerde, bajar kerd sipî û trafîk de astengîyî vejîyayî. Şaredarîya Amedî, semedê 22-23ê Çeleyî îqazê vewra zêde kerd û va "Şima eşkenê seba persan ALO 153yî bigerê".
Bi varayîşê vewre reyde trafîk de astengîyî ameyî meydan. Bajar de germîya hewayî saetanê şanî de kewte binê sifirî. Rayedaranê meteorolojî, şofêrî seba cemedgirewtiş û cemedî îqaz kerdî ke wa miqatê xo bibê. Dima ke vewre dest pêkerde, ekîbê şaredarîye zî vejîyayî cadeyan.
Îqazo meteorolojîk: Vewre do hîna zêde bivaro
Kordînasyonê Têkoşînê Vera Vewre yê Şaredarîya Amedî ya Şaristanê Girdî, goreyê beyanatê Merkezê Texmîn û Îqazî yê Mudirîya Herême ya 15. ya Meteorolojîye, seba welatîyan îqazêko newe weşana.
Goreyê îqazî:
22ê Çeleyê 2026 saete 16.00 ra heta 23ê Çeleyê 2026 saete 18.00 herême de vewra girane yena texmînkerdene.
Bi taybetî Vakurê Rojhelatê Amedî de 10-20 cm, herêmanê berzan de zî 20 cm û zafêr vewre yena pawitene.
Şaredarîye vake, zaf muhîm o ke hemwelatîyî vera şertanê giranî yê vewre tedbîranê xo bigîrê. Eke rewşêka nêbaşe virazîyo, welatîyî eşkenê Merkezê Vengdayîşî yê ALO 153yî agahdar bikerê.
