ZAZAKÎ NEWS- Amedsporî, semedê sezonê neweyî yê Lîga 1. ya TFFyî, futbolbazo 32 serre Dia Saba transfer kerd.
Amedsporo ke Lîga Yewine ya TFFyî de kay keno, Dia Saba tîma Maccabi Haifayî ya Îsraîlî ra transfer kerd û ey ewro semedê îmzakerdişê peymane ard Amed.
Heto bîn ra, Dia Sabayî bi yew parekerdişî teyareyî selam da terefgîran. Ey hesabê xo yê medyaya sosyale ser o peyama "Bijî Amedspor" vila kerde.
Dia Saba Kam o?
Dia Saba, 18ê Kanuna 1992yan de, bajarê Majd al-Krumî yê Îsraîlî de ameyo dinya û lajê yew keyeyê Ereb yo Misilman o.
Sabayî, Hapoel Haifa û Beitar Nes Tubrukî de dest bi futbolî kerd. Sabayî, mabênê serranê 2011-2018an de Lîga Premier a Îsraîlî de seba tîmanê Maccabi Tel Aviv, Hapoel Be'er Sheva û Maccabi Netanyayî kay kerd.
Serra 2019î de, Sabayî bi bonservîsê 2 mîlyon euroyan şi tîma Guangzhou R&F a Lîga Super a Çînî û serra 2020î de zî şi tîma El Nasrî ya Îmaratî.
