ZAZAKÎ NEWS - Badê cengê 12 rojan ê mabênê Îran û Îsraîlî, nika bîlançoya raştîne ya kesê ke kişîyayê û zeraro ke virazîyayo, hîna zî bena zelal. Her di hetan zî zerarêko giran dî, la bîlançoya tewr girane hetê Îranî de ya.
Hetê Îranî de
Goreyê eşkerayîyanê peyênan ê fermîyan ê Îranî, ke hetê balyozê înan ê Mîlletanê Yewbîyayeyan ra ameybî parekerdene, netîceyê hêrişanê hewayî yê Îsraîlî de:
- Tewr tay 706 kesî ameyê kiştene.
- 320 kesî zî birîndar bîyê.
Mîyanê kesanê ke ameyê kiştene de, tenya sivîlî ney, fermandarê payeberzî yê leşkerî û zanyarê nukleerî zî estê. Hêrişanê Îsraîlî de, bi taybetî serekê muhîmî sey Fermandarê Pêroyî yê Supaya Pasdaran Husên Selamî, Serekê Erkanê Pêroyî Mihemed Baqirî, û 6 zanyarê nukleerî hedef ameybî girewtene. No, seba Îranî tenya zerarêko merdimî nîyo, eynî wext de yew zerarêko giran ê stratejîk û leşkerî yo zî.
Hetê Îsraîlî de
Herçiqas sîstemê pawitişê hewayî yê Îsraîlî (sey Kubbeya asine) zafêrê moşekanê Îranî betal kerdbî zî, cewabê Îranî bi temamî bênetîce nêmend. Goreyê çimeyanê mîyanneteweyî û eşkerayîyanê nêfermîyan:
- Tewr tay 68 kesî merdê.
- 100î ra zêde kesî zî birîndar bîyê.
Merg û birîndarbîyayîşî, zafane netîceyê înan moşekanê balîstîkan ê ke sîsteman ra vîyartî û kewtî waranê sivîlan sey Tel Evîvî û şaristananê bînan, înan de bîyê. Unca zî, xeylê banî û binesazîyê stratejîkî zerar dîyo.
Cengêko kîlm, la zerarêko giran
Peynî de, cengê 12 rojan her di hetan rê zî yew bîlançoya giran verda. Herçiqas nika adirbest esto zî û diplomasiye aver şîya zî, birînê ke nê cengî akerdê û cuyê ke ameyê vîndîkerdene, do demêko derg zerrîya şaranê herême de bimano. No ceng onca mocna ke pêrodayîşê leşkerî çiqas zerar danê însanan û aştî çiqas erjaye ya.
