Mehkemeya Heqanê Merdiman a Ewropa (MHME) vizêr derheqê Hemserekê Pêroyî yê verênî yê HDPyî Selahedîn Demîrtaşî de reyna qerarêko newe da. MHME îtîrazê Tirkîya yê derheqê Demîrtaşî de red kerd. Bi nê qerarî ganî Demîrtaş hepisxane ra bêro veradayîş.
Nê qerarê MHME ser o, avukatanê Demîrtaşî seba veradayîşê muwekîlê xo muracatê Mehkemeya Îstînafî ya Anqara kerd. Çimê raya pêroyî nê muracatî ser o yo ke gelo do çi qerar bêro dayîş.
DEM Partî zî vizêr dima ke qerarê MHME ame eşkerakerdiş, eşkerayîyêke da û waşt ke Demîrtaş, Fîgen Yuksekdag û heme mehkûmê Dewaya Kobanê cade bêrê veradayîş.
Ewro Serekê Pêroyî yê MHP Devlet Bahçelî zî dima ke kombîyayîşê grûba xo ya Meclîsî viraşt, cewab da persanê rojnamegeran û va: “Veradayîşê birêz Selahedîn Demîrtaşî do seba Tirkîya bibo wesîleyê xeyrî.”