Beyanatê platformî wîna yo: “
Bi minasebeta Roja Ziwanê Kurdkî ma reyna vanê ke, ma do heta peynî pawitoxê heqê perwerde, weşîye û xizmetanê bi ziwanê dayîke bê. Ma îfade kenê ke, ziwano ke yeno çin hesibnayene, heta ke heme waranê cuye de bi azadî nêxebitîyo û estbîyayîşê ci hetê qanûnan ra nêro naskerdene, ma do micadele bikê.
Heqê weşîye heqêko bingeyîn yê merdimî yo ke bîyayîşî ra yeno dest pêkerdene, dewr nêbo û nêeşkeno bibo babeta ticeretî. Seba feqîran, cinîyan, koçberan, astengdaran, karkeran, kurdan û heme komelanê bindestan resayîşê xizmetanê weşîye hema zî çin o.
Polîtîkayê dewlete yê ke tarîx de ziwanê kurdkî qedexe kerdê, qij vînayê û xebitnayîşê ci yê warê pêroyî de asteng kerdê, mîyanê sîstemê weşîye de zî ca girewto. La ziwan tena amûrê têkilîye nîyo; o bingeyê estbîyayîşî, nasname û hişmendîya neteweyî yo. Naye ra heqê weşîya bi ziwanê dayîke tena waştişêko teknîkî nîyo; o heqêko neteweyî, komelkî û kolektîf o.
Heqê xizmetê weşîye yê bi ziwanê dayîke, heqêko bingeyîn yê merdimî yo.
Ewro sazgehanê weşîye de xizmetê bi ziwanê kurdkî bi hawayêko sîstematîk îptal benê. Tayê cayan de bi kurdkî qiseykerdişê xebatkaranê weşîye wextê karî de bifiîlî yeno astengkerdene. Materyalê agehdarkerdişî, formî û amûrê têkilîye yê bi kurdkî hema zî çin ê. Na rewşe taybetî cinîyan, kal û pîran û kesê ke koç kerdê sîstema weşîye ra dûr fînena.
Seba ke xebatkarê weşîye yê ke Kurdîstan de kar kenê bieşkê nê astengîya ziwanî ravîyarnê, ganî sîstemanê perwerdeyî hetî ra derfetê kurs û perwerdeyê ziwanî bêrê akerdene.
• Xizmetanê weşîye de ganî sîstema zaf-ziwanîye biba mecbûrî.
• Xizmetê agehdarkerdişî, çarnayîşî û şêwirmendîya bi ziwanê dayîke, ganî heme sazgehanê weşîye de bibê.
• Personelanê weşîye rê ganî perwerdeyê famkerdişê kulturî û hişmendîya ziwanî bêro dayene.
• "Heqê weşîya bi ziwanê dayîke" ganî bikewo binê garantîyê destûrî û sewîyeya qanûn û sazgehan de bêro naskerdene.
Ma dîsa vanê ke heqê weşîya bi ziwanê dayîke heqêko bingeyîn o.
