ZAZAKÎ NEWS – Komedyen Deniz Goktaşî, stand-upê xo yê bi nameyê “Deryaya Mirî” 1ê Hezîrane de Tîyatroyê Cemil Topuzlu yê Harbiye de mojnabi û 25ê Hezîrane de zî YouTube de weşandbi. Beşê nê stand-upî keyepelanê medyaya sosyale de amey parekerdiş û Goktaş ame hedefmojnayîş. Serdozgerîya Îstanbulî zî 29ê Hezîrane de bi sûcdarîya ke “Ercê dînî qij visto” derheqê ey de tehqîqat da dest pêkerdiş.
Goktaş, 2ê Temuze de wexto ke teberê welatî ra agerayêne, Teyaragehê Îstanbulî de ame girewtiş û ey berdî Merkezê Emnîyetî yê Îstanbulî. Goktaşo ke emnîyet de îfadeyê xo da, şewêk uca de mend.
Komedyen Deniz Goktaş Adliyeya Çağlayanî de zî îfade da dozgerîye. Dozgerî bi waştişê tewqîfkerdişî şawîya dadgeh. Dadgehî zî bi sûcdarîya ke “heqaretê serekkomarî kerdo” û “ercê dînî qij mojnayo” qerarê tewqîfkerdişê Deniz Goktaşî da.
