Taxa Kuyu ya Çêrmûge ke tede bi hezaran donim baxê engure estê de emser varan zêde bi rîyê citkaran huyeno. Varişo zêde fersend da ke citkarî malê xo bi vayêko baş biroşê.
Citkar Cuma Çınarî da zanayîş ke emser mal zaf o; beşêkê engura xo sey fêkî roşeno û beşêk ra zî bastêq û dims virazeno. Çınarî îfade kerd ke baxê ey ê engure 3 donim o, teqrîben 3 tonî berhem paweno û goreyê kalîteyî do kîloyê ci 70 ra heta 100 lîrayan de biroşo.
Taxa Kuyu de tewirê enguran ê sey Genç Mehmet, abderî, şîre, vankî, tahannebî, çimê gayî, boça luye û boğazkere yenê ramitiş. Engura Çêrmûge sere de Amed, bajar û qezayanê dormeyî de roşîyena.
