ZAZAKÎ NEWS - Beledîyaya Peyasî ya Amedî, Mudîrîya Karanê Kultur û Sosyalan ser o, seba gedeyan û pîlan atolyeyanê ziwanî yê Kurmanckî û Zazakî akena. Ame parekerdiş ke perwerde do hetanî peynîya amnanî dewam bikero.
Atolyeyê ke seba gedeyanê mabênê 10-15 serrîyan ameyê akerdiş, do Merkezanê Perwerdeyî yê Halîl Îbrahîm Oruçî û Aydin Erdemî de bêrê dayîş. Kursanê bi Kurmanckî û Zazakî de, perwerde do wîna bêro dayîş:
Musayîşê Kurdkî bi kayan
Lawikî, sanikî, drama û çalakîyê resimî
Hunerê bingeyînî yê ziwanî (wendiş-nuştiş-qiseykerdiş)
Musayîşo bi grûban (musayîşê hevalanî)
Seba pîlan kursê wendiş-nuştişî
Seba pîlan zî bi sloganê "Seba wendiş û nuştişê ziwanê xo yê Maye erey nîyo!", dersê wendiş-nuştişî yê Kurmanckî û Zazakî do bêrê dayîş.
Hemserekanê Beledîyaya Peyasî Berîvan Gulşen Sîncar û Cengîz Dundarî, bi afîşanê ke vîla kerdî, veng da heme şarî ke bêrê kurdan û ziwanê xo bimusê û aver berê.
