ZAZAKÎ NEWS - Beledîyaya Bajarê Girdî ya Amedî, xebata xo ya mojnayîşê beyîtanê Kurdkî rê dewam kena. Waştişê welatîyan ser o cadde û kuçeyê sûke bi tabelayanê ke ser o nuşteyê şîîrê Kurd estê, yenê xemilnayîş.
Projeyo ke hetê Mudîrîya Şubeyê Pawitiş û Averberdişê Ziwanî ya Daîreya Karanê Kultur û Sosyalan a Beledîye ra yeno rayraberdiş de, Caddeyê Gazî ser o stûnanê elektrîkî ser o beyîtê şaîranê muhîman ê sey Ehmedê Xanî, Feqîyê Teyran, Melayê Cizîrî, Pîremêrdî û Hacî Qadirê Koyî ameyî aliqnayîş.
Mudirê Şubeyê Pawitiş û Averberdişê Ziwanî Tahîr Baykuşakî, pare kerd ke proje bi wesîleya 15ê Gulane, Roja Ziwanê Kurdkî dest pêkerdo û va ke, ê wazenê seba mojnayîşê Kurdkî kuçe û caddeyanê Amedî de, beyîtanê şîîranê Kurdkî yê klasîkan berê aliqnayîş. Baykuşakî îfade kerd ke no caardiş tena "xemilnayîş" nîyo û va, no "îfadeyê wayîrvejîyayîşê ziwan û edebîyatê ma" yo.
Baykuşakî îzah kerd ke projeyî rê hetê şarî ra eleqeyêko zaf pîl est o û va, Ma do Caddeyê Gazî rê 60 tabelayanê neweyan zî daliqnê. Teberê beyîtanê klasîkan de, ma do ca bide vateyanê verênan ê Kurdkî zî.
Baykuşakî îfade kerd ke proje do tena bi caddeyan sinorkerde nêmano û va ke, wextêkê nizdî de, parkî zî do bi unsuranê ke kulturê Kurdkî mojnenê bêrê xemilnayîş. Armancê ma no yo ke na herême bi beytanê şaîran û vateyanê verênan dewlemend bikerê. Paştîdayîşo ke şarê ma ra yeno, hêz dano ma. Armancê ma; o yo ke wa her kuçe de Kurdkî (Zazakî-kurmanckî) bêra hîskerdiş û dewlemendîya ma ya edebî bireso cimatî."
