ZAZAKÎ NEWS - Ewro wefatê Serekkomarê verênî yê Iraqî û Sekreterê Pêroyî yê Yewîya Nîştimanî ya Kurdîstanî (YNK) Celal Talebanî ser o 8 serrî vîyartî. Talebanî ke sey "Mam Celal" ameyêne naskerdiş, 3ê Teşrîna Verêne ya 2017 de Almanya de wefat kerdbi.
Weşîya Celal Talebanî 17ê Kanûne 2012 de, badê ke Bexdad de gonî perra mezgê ey, xirab bîbî.
Badê ke demêko derg Almanya de ame tedawîkerdiş, 19ê Temmuza 2014 de ageyra Silêmanî, la seba tedawî newe ra şi Almanya. Mam Celal 3ê Teşrîna Verêne ya 2017 de, Berlîn de, 84 serrîya xo de wefat kerd. Mezelê ey nika Silêmanî de ya.
Celal Husamettîn Nurullah Talebanî serra 1933 de qezaya Koyê ya Hewlêrî de ame dinya. Serra 1946 de, hema 13 serrîya xo de, bi endamê komelêka nimitî ya wendekaranê Kurdan û dima tewrê yewîya wendekaran a Partîya Demokrate ya Kurdîstanî (PDK) bi.
18 serrîya xo de seba komîteya merkezî ya partîye ame weçînayîş.
Serra 1959 de Fakulteya Huqûqî ya Unîversîteya Bexdadî qedêna. Talebanî destpêkê Şorişê Êlule de wayîrê rolêko muhîm bi û sey kesêko nêzdîyê Mele Mistefa Barzanî ameyêne naskerdiş.
Serra 1975 de Şam ke paytextê Sûrîye yo de, bi çend embazanê xo Yewîya Nîştimanî ya Kurdîstanî (YNK) na ro û sey sekreterê pêroyî yê partîye ame weçînayîş.
Mam Celal, ke serranê 1970 û 1980 de Mucadeleyê Xelisîyayîşê Kurdan de rolêko muhîm kay kerd, serra 1986 de bi Îdrîs Barzanî reyde ronayîşê Cepheyê Pîlî yê Kurdî de rolêko sereke kay kerd.
Serra 1998 de bi mîyancîtîya Amerîka û Brîtanya, bi Pîyameyîşê Washingtonî herbê zereyî yê 4 serran qedêna.
Badê rijnayîşê rejîmê Sedamî serra 2003 de, bi endamê Meclîsê Demkî yê Rayraberdîşê Iraqî û nuştişê Qanûnê Bingeyênî yê Iraqî de rolêko muhîm kay kerd.
Celal Talebanî 6ê Nîsane 2005 de sey Serekkomarê Iraqî ame weçînayîş û tarîxê Iraqî de reya verêne Kurdêk no meqam girewt. Talebanî heta serra 2014î nê meqamî ser o mend.
Badê wefatê ey, Herêma Kurdîstanî de 7 rojî û seranserê Iraqî de zî 3 rojî tazîyeya neteweyî amey îlankerdiş. Mam Celal Goristanê Dabeşanî yê Silêmanî de ameyo definkerdiş.
Celal Talebanî bi Hero Îbrahîm Ehmed reyde zewijîyaye bi û di lajê ey ê bi nameyê Qubad û Bafel estê. Bafel Talebanî nika Serekê YNKyî yo û Qubad Talebanî zî Hetkarê Serekwezîrê Herêma Kurdîstanî yo.
