Amedspor vizêr hefteya 17. ya Lîga 1. ya Trendyolî de bi meymanê Bodrumsporî û musabeqa 0-0 qedîyaye.
Verê dest pêkerdişê maçê Amedspor û Bodrumsporî, terefdaranê taximê Bodrumsporî bi kerrayan hêrişê terefdaranê Amedsporî kerd. Hêriş de Gulîzar Ozdemîra ke Aydin ra seba paştîdayîşê Amedsporî şîbî stadyumî, sereyê xo ra bîye birîndar.
Otobuse day kerrayan ver
Onca, dima maçî zî hêrişê terefdaranê Amedsporî ame kerdene. Hêriş de otobusa terefdaranê Amedsporî zerar dî û camê ci şikîyayî.
Serekê Amedsporî Nahît Erenî hesabê xo yê Xî ser o bi yew peyame hêriş şermezar kerd û waşt ke wa tedbîrê lazimî bêrê girewtene û hêrişkerî bêrê tesbîtkerdene.
Rewşa birîndare weş a
Nahît Erenî da zanayene ke rewşa Gulîzare weş a û dima tedawîya nêweşxaneyî şîya keyeyê xo.
Terefdarê Amedsporî zaf reyî musabeqayanê teberê Amedî de raştê hêrişanê nîjadperest û fekkîyan yene.