ZAZAKÎ NEWS - Çemê Sînagî, yo ke qezaya Çermûge ya Amedî de yo, nê rojanê german ê amnanî de bîyo ca û warê hezaran gêrayoxan û welatîyanê ke germ ra remenê.
Çemo ke mîyanê koyan û dereyanê serdinan de herikîyeno, bi tebîetê xo yo efsûnî mêmanan anceno xo.
Qezaya Çermûge, bi tebîetê xo yo rindek û hewayê xo yo honik, seba welatîyanê ke şaristananê dormeyî ra germ ra remenê, mêmantîye kena. Çermûge, bi çem, dere, germawe û çirranê xo eleqeyê gêrayoxan ancena. Bi taybetî Amed, Riha û Xarpêt ra û şaristananê bînan ê Tirkîya ra, gêrayoxî wextê amnanî de verê xo danê nê herêmanê honikan.
"Kesê ke germ ra remenê, yenê noca"
Wayîrê Restoranî Nebi Karamehmetogluyî rindekîya Çemê Sînagî wina ano ziwan:
"Çemê Sînegî dormeyê xo de bi daranê tebîîyan girewte yo. Merdimî seba arayî, werd û pîknîkî yenê noca. Seba dûrîkewtişê germî, Çemê Sînagî cayoko zaf weş o. Amed, Erxenî, Sêwreg, Riha, Êlih û Mêrdîn ra kesê ke germ ra remenê, yenê noca. Mîyanê merkezî û noca de ferqê germîye 20 derece yo.”
"Noca de hewayêko cîya esto"
Gêrayox Semra Memîşe zî keyfweşîya xo wina arde ziwan:
“Zaf weş o, noca zaf weşê ma şi. Noca de hewayêko cîya esto, merdim eşkeno bi keyeyê xo reyde nişo ro û çayêk bişimo. Çirrê aye zî zaf weş û pak a.”
Amnanan de Çermûge de qerebalixîyêko pîl virazîyeno. Bi ameyîşê gêrayoxan û welatîyanê Çermûgijan ê ke şaristananê bînan û teberê welatî de yê, nufusê qezaye hetanî di qatî zêde beno. Ameyîşê gêrayoxan, ekonomîya qezaye rê zî feydeyêko pîl dano.
