Enwer Yılmaz
Dinya de derdêko zaf gird û giran esto ke roj bi roje mîyanê şarî de vila beno: çimvêşanîya însanan. Xora pîzeyê însanî bi yew-di loqmanê nanî û yew tasa awe mird beno, labelê çimê merdimê çimvêşanî bi malê heme dinya zî mird nêbeno.
Eke ma biewnîyê xoza û tebîetî ra, ma vînenê ke çi heywanî çi teyr û turî, tena qasê vêşanîya xo werd wenê; wexto ke mird bîy, destê xo ancenê û bara gandaranê bînan veradanê. Labelê zaf merdimî estê ke çiqas mal û milk arê bidê, çiqas xezîna û pereyan pêser kerê zî çimê înan mird nêbeno. Benê wayîrê malî, benê wayîrê koşk û serayan, benê dewlemend, la ancî zî vêşan ê. Çunke vêşanîya înan vêşanîya pîzeyî nîya; vêşanîya nefsî, çimkorîye ya.
Merdimo ke kewto peyê na çimvêşanîye, çîyo ke destê ey de esto qedr û qîymetê ey nêzano. Ne şukrê weşîye û sihetê xo keno, ne zî qîymetê nan û awe zano. Her çîyî xo rê kêmî vîneno û tim hîna zaf wazeno. Seba ke malê xo hîna zêde biko, heqê karker û emegdaran weno, kedwerîye keno û çîke ra şerm nêkeno.
Nê merdimê winasîyî tena weşîye, keyf û rehetîya xo fikirîyenê. Çimê înan tena menfeetê înan vîneno; dormeyê xo ra, der û cîranan ra, derd û kulanê şarî ra kor û ker ê. Zerrîya înan sey kemere-kerra huşk û pêt bîya; wijdanê înan merdo, coka însananê bînan rê merhemet nêkenê. Dormeleyê înan de hende feqîrî, xizanî û bêkesî estê ke şewe vêşan rakewenê û dej ancenê. Labelê ê merdimê zerrîhuşkî destê hetkarîye dergê kesî nêkenê; vengê înan, hawara înan, hesirê çimanê înan û bermayîşê tutanê înan nêeşnawenê.
Halbûkî emrê însanî zaf kilm o û peynîya her kesî merg o. Merdim çiqas mal û zerrn arê bido zî, rojeke do heme çîyî tîya de verado û tena bi yew kefeno sipî şêro binê herre. Vateyê verênan de vajîyeno ke: "Çimê merdimê çimvêşanî ancax bi yew kefa herre mird beno."
Rûmet û erja merdimîye bi mal û milkî nê, bi wijdan, zerrîweşîye, başîye û parekerdişî peymîyeno. Merdimo ke veng û hawara mezlûm û feqîran nêeşnaweno û tena nefsê xo fikirîyeno, malê dinya pêro yê ey bo zî, o hema zî feqîro tewr pîl o; çunke ey aramîya zerrî, birayîye-wayîye û însanîya xo vîndî kerda. Dinya bi çimvêşanîye nê, ancax bi merhemet, parekerdiş û zerrîweşîye bena roşn û rindek.
